Komputer
Komputer no sambua mesin elektronik si tola manema, mangirö'ö ba mangohalöŵögöigö gofu hadia ia nifotöi data nibe'e khönia bakha tobali sambua informasi. Börö me tenga niha da'a, ha sambua mesin elektronik, moguna labe'e khönia wanuturu (li Indonesia instruksi), ena'ö tola itema, i'irö'ö ba i'ohalöŵögöi gofu hadia ia data nibe'e khönia andrö.
Famazökhi instruksi andrö lafotöi ia pemrograman ba li Indonesia ma zui coding ma programming ba li Inggris. Tenga faoma fehede lafa'ema ngawalö instruksi andrö niha (simane na taŵaö ba ndraono we'amöi wowöli adulo ba fasa), bahiza la'oguna'ö sambua program, bakha khönia tola tasura ngawalö instruksi andrö. Oya program si tola la'oguna'ö ba wanura instruksi komputer andre (faigi gambara duma-duma instruksi nisura bakha ba Python ba nga'örö andre).
Program andre lafotöi ia fakake sombuyu (li Inggris software, li Indonesia perangkat lunak) börö me fakake sa ia, bahiza tebai tawawaya ma tagogohe ia faoma tangada. Ena'ö tola tefalua instruksi nifa'anö faoma fakake sombuyu andre moguna göi fakake sabe'e (li Inggris hardware, li Indonesia perangkat keras) eluahania fakake si tola tawawaya ba ta'ohe faoma tangada. Fakake sabe'e andre zi to'ölönia laŵa'ö niha komputer, simane komputer laptop ma zui desktop, heŵa'ae fao ba komputer göi wakake sombuyu.
-
Instruksi wangerai nisura bakha ba wakake sombuyu sotöi Python -
Ngawalö lala-lala bakha ba komputer soroma hulö lala faoma tandra lalu lintas. -
Ösi komputer si oi mufasa ngawalö wakake elekronik. Barönia tou so lala-lala soroma hulö lala ba tandra lalulintas. Da'a nifotöi fakake sabe'e -
Komputer si no muhaogö nifotöi desktop -
Komputer side-ide ba sanifi-nifi nifotöi laptop -
Komputer side-ide ni'oguna'ö ba wangerai nifotöi kalkulator
Bakha ba wakake sabe'e andre no mufasa fefu ngawalö lala-lala ba wanema, wangirö'ö ba ba wangohalöŵögöigö data nibe'e bakha (faigi gambara ba nga'örö andre). Lala-lala andrö tola tafakhili ia ba lala sebua awö dandra-tandra lalu lintas si so khönia. I'ohe ita ba zi sambua nahia sara lala, ba ba lala andrö so ngawalö dandra sanuturu heza tola tadölö ita, heza tahole'ö ita na möi ita ba zi sambua nahia, heza tola tebato ita ba wame'e tou gama-gama ba heza göi tebai tebato ita, btn. Fefu da'a tenga nilau dödö ero zamösana bahiza no muhonogöi molo'ö goi-goi. Simanö göi goi-goi bakha ba komputer. Lafa'oli ia molo'ö lala si faudu ba satulö, andrö göi latötöi ia logis, eluahania molo'ö lala si faudu ba atulö.
Ba mböröta la'oguna'ö mesin elektronik andre ba wangerai hadia ia. Andrö wa latötöi ia komputer, moroi ba li Inggris compute eluahania mangerai ma zui computer eluahania mesin wangerai. Komputer side-ide sasese ta'ila la'amawa göi ba fasa ya'ia nifotöi kalkulator, eluahania mesin fangerai, me ha da'ö duho halöŵö si tola ifalua, ya'ia da'ö mangerai. Faoma komputer bö'ö simane telepon sonekhe (li Inggris smartphone, li Indonesia telepon cerdas), laptop ma zui desktop, tola lalau manura niha, ma zui mamaigi video awö foto, btn. tenga ha tola mangerai.
Wikipedia no halöŵö nifalului zato.
Tolo Wikipedia ba wanohugö wanura ya'ia, na so khöu onönöta nösi. Saohagölö.