Instagram

Moroi ba Wikipedia
Ae ba navigasi Ae ba wangalui
Instagram

Li36 li (Android), 29 li (iOS) [1]
SangotomosiKevin Systrom, Mike Krieger (Burbn, Inc.)
Bolokha gu'öInstagram.com
Bosi Alexa 16 (Global, Mei 2019)[2]
Lisensi konten
Perangkat lunak gratis

Instagram ma asese te'adogo'ö ia IG ma Insta[3] ya'ia da'ö no sambua aplikasi ba wamazaewe turia faoma foto awö video he ba instagram samösa ma zui ba media sosial bö'ö.[4] Sambua fitur somasi-masi niha khönia ya’ia fangoguna’ö filter same’e oroma tefabö’öni gambara ba foto/video awö fitur wanaba foto ena’ö fagölö-gölö wa’ebua irege oroma ia hulö nihalö faoma kamera si baga (lafotöi ia fitur instamatic). Foto nifazökhi faoma fitur andre oroma ia hulö koda polaroid si no fabö’ö moroi ba rasio foto 4:3 ma 16:9 si to’ölö.

Aplikasi Instagram tola te'oguna'ö ia ba hape iPhone ma tablet iPad (i’otarai iOS 7.0) awö ba hape faoma tablet Android (i’otarai Android 2.2). Tesöndra ia göi yaŵa ba hape Windows si no teböhöli. Instagram tola mufailo moroi ba Apple AppStore ma zui moroi ba Google Play Store.

Me 9 April 2012 ibe’e duria Facebook wa no i’öli Instagram andre tobali okhötania. Fa’ebua mbölinia sara miliar dollar Amerika.[5]

Waö-waö[bulö'ö | bulö’ö kode]

Burbn, Inc.[bulö'ö | bulö’ö kode]

Me döfi 2010 tefasindro Burbn, Inc. tobali sambua perusahaan teknologi side-ide si to'ölö latötöi startup samazökhi aplikasi smartphone.[6] Ba mböröta la'osara'ö ya'ira CEO Burbn, Inc. sotöi Kevin Systrom faoma Mike Krieger ba wondregesi tödö wangehaogö aplikasi mobile nisura faoma li HTML5 nibe'era töi Burbn.

Bahiza ba zi lö mudöna-döna, samigu aefa da'ö tumbu mbua wangera-ngera si bohou. Me lanehegö aplikasi versi si föföna Burbn sawena la'awalisi, la'ila wa töra oya khönia ngawalö si tola mufalua (nifotöi fitur). Abua khö Kevin Systrom faoma Mike Krieger wangalösi ngawalö fitur si no tohöna andrö. Andrö wa lafuli zui labörötaigö wamazökhi aplikasi andrö ba fitur sedöna lafazökhi ha fitur komentar, same'e ena'ö tola lasura niha zöndrara sanandrösa ba foto ma video awö fitur omasi, same'e ena'ö tola la'oroma'ö niha wa omasi ira foto ma video andrö. Andrö wa tobali ia aolikasi Instagram ni'ilada iada'a.[7]

Töi Instagram[bulö'ö | bulö’ö kode]

Töi Instagram lahalö moroi ba wehede instan ba gram ni'adogo'ö tobali instagram. Instan eluahania i'anema'ö, sambua döi nibe'e khö kamera polaroid si'anema'ö mame'e baero foto aefa lahalö ia.[8] Simanö göi Instagram. Tola i'anema'ö i'oroma'ö foto ba wa'alio, irege tola mufazaewe ia ba niha bö'ö.

Fehede gram tehalö moroi ba wehede telegram. Telegram no sambua wakake telekomunikasi si tola alio sibai mama'ema turia ba nahia saröu. Simanö göi Instagram, tola alio ifa'ohe'ö foto/video khö niha ba zi sagörö ulidanö mangoguna'ö fuka gu'ö nifotöi internet.[9]

Me 9 April 2012 tefa'olo duria wa no i'öli Instagram Facebook. Böli Instragram nibu'a Facebook sara miliar dollar Amerika, so nibu'a ba gefe so göi nibu'a faoma saham.[5]

Ba 11 Mei 2016 tefa'ele'ö zikhala si bohou aplikasi awö ikon ni'oguna'ö. Sikhalania hulö kamera nifola'a-la'a hulö ndrumi.

Ngawalö fitur[bulö'ö | bulö’ö kode]

Molo'ö zangoguna[bulö'ö | bulö’ö kode]

Lala wohalöŵö Instagram ya'ia da'ö molo'ö-lo'ö niha bö'ö nifotöi sangoguna ma zui la'o'ö-o'ö ita sangoguna'ö bö'ö. Ena'ö tola ta'o'ö ma tobali solo'ö niha bö'ö ita moguna tafasura'ö döida ma asese laŵa'ö mamazökhi akun. Na no so akunda, tola taforoma'ö wa'omasi ita sambua foto niha bö'ö (muhöndrögö ikon ♥ soroma hulö dödö) ma zui tasura zöndrada sanandrösa ba zi sambua foto. Itugu ato niha same'e zöndra ba same'e tandra wa'omasi ba zi sambua foto/video, itugu tehöngö ba tefazawili foto/video andrö. Simanö göi itugu ato niha solo'ö ya'ita ba itugu tehöngö ita ba gotalua fefu zangoguna ba Instagram.

Sambua fitur somasi-masi niha nasa ba Instagram, tola tefakhai ia ba Twitter faoma Facebook, irege abölö tefazaewe foto/video ba media sosial misa.

Mamairö foto[bulö'ö | bulö’ö kode]

Tuho wa la'oguna'ö Instagram niha börö me tola alio lafairö sambua foto ma video irege muzawili ia ba i'anema'ö tola la'ila sangoguna bö'ö. Foto ma video andrö tola lahalö moroi ba kamera smartphone ni'oguna'ö ma zui moroi ba album ma galeri foto si no so bakha ba smartphone.

Kamera[bulö'ö | bulö’ö kode]

Gambara si no muhalö faoma aplikasi Instagram tola göi mu'irö'ö bakha ba smartphone. Bakha ba Instagram so ngawalö efek si tola mu'oguna'ö ba wame'e ena'ö sökhi wamaigida sambua foto. Duma-dumania so sambua efek nifotöi tilt-shift same'e ena'ö fokus gambara te'orudugö ba zi sambua niti (fokus). Na no tehalö sambua foto faoma Instagram, so bakha ba Instagram oya lala wamulö'ö foto andrö molo'ö somasi dödö zangoguna.[10]

Tola mufairö oya foto/video ba Instagram, lö ndrege wa'oyania. Awai ndregenia fa'ebolo/fa'anau foto, tola mu'oguna'ö rasio 3:2 ma zui 1:1 si fagölö ira wa'anau ba fa'ebolo. Fatua lö mufairö ba Instagram silötolalö'ö mufaudugö wa'ebua foto/video andre.

Efek foto[bulö'ö | bulö’ö kode]

Ba versi siföföna so khö Instagram 15 efek foto si tola la'oguna'ö niha ba wamulö'ö gambara khöra. Efek da'ö ya'ia da'ö: X-Pro II, Lomo-fi, Earlybird, Sutro, Toaster, Brannan, Inkwell, Walden, Hefe, Apollo, Poprockeet, Nashville, Gotham, 1977 ba Lord Kelvin.[11] Me 20 September 2011 inönö 4 efek si bohou Instagam, ya'ia da'ö: Valencia, Amaro, Rise, Hudson ba latibo'ö 3 efek si no atua: Apollo, Poprockeet, ba Gotham.

Fitur tanöbö'ö si so ba nahia wamulö'ö ya'ia da'ö tilt-shift si fagölö ba fitur kamera tilt-shift si no muŵa'ö yaŵa. Faoma fitur andre tola ta'etu'ö heza so sambua naha ba foto si tobali fokus ba fefu nahia ba zi fasui ya'ia tobali ondrumö. So dombua wonga'eu tilt-shift andre: si'öfa sagi ba sowulo-wulo. Tola mu'ebua'ö ma mu'ide-ide'ö wonga'eu andrö molo'ö somasi zangoguna. Baero da'ö tola göi labulö'ö wabölö-bölö wa'ondrumi nahia si fasui fokus, na alö wa'ondruminia ba oroma nasa gofu hadia ia. Na abölö-bölö wa'ondruminia ba ambö oroma sa'ae hadia ia.[12]


Umbu[bulö'ö | bulö’ö kode]

  1. "How do I change my language settings?". Instagram. Mufaigi me Maret 3, 2022. 
  2. "Instagram.com Traffic, Demographics and Competitors - Alexa". www.alexa.com (ba li Inggris). Arsip moroi versi asli irugi 2022-02-10. Mufaigi me 3 Maret 2022. 
  3. "Do YOU know what social media rules you've signed up to? - CBBC Newsround" (ba li Inggris). Mufaigi me September 1, 2018. 
  4. Frommer, Dan (3 Maret 2022). "Here's How To Use Instagram". Business Insider. Mufaigi me 20 Mei 2011. 
  5. 5,0 5,1 "Facebook to Acquire Instagram". Facebook. 9 April 2012. Mufaigi me 3 Maret 2022. 
  6. Asese laŵa'ö ba khöda hp nihalö moroi ba li Inggris handphone, telepon si tola monaha ba lalu'a ba lö fesu-fesunia irege tola la'ohe fao khöda (ba li Inggris mobile). Bahiza nifotöi hp ha telepon satua si lö koneksi internet. Iada'a latötöi ia smartphone me tola ilau oya ngawalö tenga ha fahuhuo fatelepon.
  7. Via Adrian Aoun (8 Oktober 2010). "What is the history of Instagram?". Quora. Mufaigi me 3 Maret 2022. 
  8. Ba kamera bö'ö moguna ua lafa'ohe'ö filem foto si no lahalö ba sambua studio irege laraka foto da'ö oroma ba garate.
  9. "About Us". Instagram. Mufaigi me 3 Maret 2022. 
  10. PU. "Revamped Instagram 2.0 Hits the App Store: With New Filters, Live Effects, and High Resolution Save". Appotography. Mufaigi me 3 Maret 2022. 
  11. Becca Caddy (21 Juni 2011). "Why is Instagram So Popular?". The Future is Entertaining. Arsip moroi versi asli irugi 2011-10-06. Mufaigi me 3 Maret 2022. 
  12. Marc Flores (11 Maret 2011). "Instagram for iPhone updated with new features and effects". Into Mobile. Mufaigi me 25 September 2011.