Wikipedia:Sanandrösa

Komunitas WikiNias no sambua angowuloa Nono Niha sangodödögö wama'anö li Niha yaŵa ba gu'ö. Iada'a so tölu ngawua halöŵö ni'otahögöda, ya'ia da'ö Wikipedia, Wikikamus ba Wikibuku Nias.

Halöŵö ba Wiki no fabö'ö sibai moroi ba halöŵö bö'ö börö me tenga halöŵö zi hadauga niha ia, bahiza no halöŵö nifalului zato.

Gofu haniha tola fao monönö ngawua zura, ba tola mamulö'ö zura si no so ena'ö abölö te'a'azökhi ia. Ngawalö zura nifa'anöda ba da'a no moroi khöda, soguna khöda, ba soguna khö ndraonoda mi föna.

Waö-waö

Ba dalu ndröfi 2020 lafaigi ira Sirus Laia awö Apolonius Lase wa ba sambua grup WhatsApp la'amalösi Ono Niha wa itugu ato ira sambö fahuhuo ba li Niha.

Töra moroi ba da'ö ato zi lö mangila sa'ae hewisa wama'anö sambua ndroto wehede si faudu ma zui hewisa wanura ya'ia, simane asese ta'ila ba ngawalö nisurara ba media sosial.

Baero da'ö no mo'ambö-amböta li Niha. Asese lö fangali ba li Niha wehede ni'oguna'öda ba li Indonesia. Börö da'ö ato zanörö lala saoha ba alio, ya'ia da'ö wangoguna'ö namö li Indonesia.

Halöŵö si lima fakhe

Moroi ba da'ö ibörötaigö ifa'anö sambua draft Sirus Laia. Ibe'e döi draft andre Program Pengembangan Bahasa Nias di Era Digital 2020-2025. So tölu faosatö ia: dokumentasi, standardisasi ba promosi.

Ena'ö aoha khö Ndraono Niha wangoguna'ö li Niha moguna ua te'owuloi fefu ngawua wehede ba Li Niha (fefu wehede si fakhai ba hada, sinumbua, aurifö ba tanöbö'önia). Da'a nifotöi dokumentasi.

Aefa da'ö moguna mufazökhi goi-goi saoha, hewisa wama'oli ngaro wehede ba hewisa wanura ya'ia. Da'a standardisasi.

Baero da'ö moguna mufazökhi fakake same ena'ö aoha wanura ba li Niha (fafa wanura si so hurufo ö ba ŵ) börö me lö hurufo si dombua andrö ba fafa wanura ni'oguna'öda ero ma'ökhö.

Töra moroi ba da'ö moguna göi nifotöi fabrik bahasa Nias, ya'ia da'ö fangalui wangali wehede moroi ba li Indonesia si lö fangalinia ba li Niha. Edöna mu'owuloi wehede si no atua si lö asese la'oguna'ö niha sa'ae ma zui mufazökhi wehede si bohou ba ma zui muwawalö wehede moroi ba li bö'ö simane li Indonesia.

Awena ba faosatö si tölu moguna promosi li Niha ba media sosial, same ena'ö muzawili ba la'ila niha oi wehede si bohou andrö irege tebörögö la'oguna'ö ia.

Draft program andrö tefaehagö föna mato ha'uga niha me 16 Juni 2020 bakha ba sambua konferensi zoom.

Fao dödö fefu zi fao ba rafe andre ba wamörögö halöŵö andrö ba te'etu'ö göi wangalui media heza tola la'irö'ö fefu wehede ni'owuloi (dokumentasi) andrö. Gasa-gasa ba mu'oguna'ö ua Google Drive.

Ba hiza oroma wa ambö fagöna media andre ba wamalua gohitö dödö program.

Börö da'ö lö ara aefa da'ö tefawu'a fefu berkas-berkas moroi Google Drive andrö lumalö sisa ba Wiktionary awö ba Wikipedia li Niha.

Me luo da'ö no so göi Wikipedia li Niha ba zosou'a (inkubator) Wikimedia, andrö wa ibörögö Sirus Laia wama'anö Wikikamus li Niha. Furi hö tebörögö göi Wikibuku li Niha.

Ba hiza lö aefa gohitö dödö sebua moroi ba duduma hörö, ya'ia da'ö ba wangirö'ö fefu zanandrösa ba budaya, sejarah ba bahasa Danö Niha (dokumentasi) ba Wikipedia, Wikibuku ba Wikikamus li Niha.

Lö ara aefa da'ö oi monönö ira sangodödögö wangowuloi fehede ba Wikikamus ba sanura ngawalö zura ba li Niha ba Wikipedia.

Halöŵö andrö mowua ia me aboto Wikikamus/Wikipedia li Niha moroi ba zosou'a tobali resmi me 13 Januari 2021 (proposal tetema'ö me 17 Desember 2020).

Da'a ngaluo wa'atumbu resmi li Niha ba Wikimedia, ba eluhania ba Internet ma'asagörö: 13.01.2021!

Latohugö nasa wohalöŵö ira talifusöda ba Komunias WikiNias irugi ma'ökhö. Buania tola ta'ila yaŵa ba Wikipedia, Wikikamus ba Wikibuku Nias.

Da'a no halöŵö nifalului zato. Moroi khöda, soguna khöda ba soguna khö ndraonoda miföna. Omuso dödöma na fao ndra'ugö ba wanohugö wama'anö li Niha andre yaŵa ba gu'ö.

Ya abölö mowua halöŵöda andre. Ya'ahowu!

Ngawalö zinura sanandrösa ba program

Program Pengembangan Bahasa Nias 2020-2025 (Li Indonesia)
Tantangan mengembangkan bahasa Nias di Wikimedia (Li Indonesia)
New Wikimedia projects main challenge and the possible solution (Li Inggris)
Proposal untuk rapat perdana Wikipedia Nias (Li Indonesia)
Melestarikan bahasa Nias untuk siapa dan bagaimana (Li Indonesia)
Strategi mengembangkan bahasa Nias di era digital (Li Indonesia)
Program Pengembangan Bahasa Nias dalam Tiga Diagram (Li Indonesia)
Strategi mengembangkan bahasa Nias melalui konten bermutu (Li Indonesia)

Umbu

Fabaliŵa lala

Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö