Tablet (komputer)

Lafotöi komputer tablet ma la'adogo'ö manö tablet sambua komputer soroma hulö telefon gokhö sonekhe nifotöi smartphone (li Indonesia: telepon cerdas) bahiza abölö ebolo detenia. Duma-dumania fa'ebolo dete telefon gokhö sonekhe ba gotalua zi 3–6,9 inci, hiza tete tablet so ba gotalua zi 7–14 inci. Na la'oguna'ö telefon gokhö ba wahuhuosa ba niha bö'ö, to'ölö la'oguna'ö tablet ba wombaso buku awö nga'örö zinura ba internet ma zui ba wanura dokumen faoma fafa wanura (li Indonesia: papan ketik) ma zui ba wogambaraini hadia ia mangoguna'ö fena nifotöi stilus (li Inggris: stylus). Börö me lö te'oguna'ö ia hulö telepon, andrö wa lö khönia naha nifotöi kartu SIM. So sa ösa tablet si so naha kartu SIM khönia, bahiza te'oguna'ö ia töra-töra ba wamakhai tablet andrö ba internet, tenga ba wahuhuosa faoma telepon.

Ngawalö tablet

Ba mböröta la'oguna'ö tablet ya'ira niha soya halöŵö ba perusahaan. Börö me oya halöŵöra moguna khöra nifotöi kalender, heza oi lasura ginötö fefu halöŵö sinangea lafalua ba zi so föna. Baero da'ö moguna khöra nifotöi buku alamat, heza la'irö'ö fefu döi zi fa'ila khöra ba heza toröi ira awö wa hadia numero telepon-ra. Faigi duma-dumania tablet N800 nifazökhi perusahaan Nokia ba gambara tou.

Bahiza no oya lala wangoguna'ö tablet ma'ökhö: mombaso buku, mombaso nga'örö zura ba internet, mamaigi video ba YouTube, fahuhuo faoma video, mamazökhi gambara, btn. So dombua merek tablet sabölö oya la'oguna'ö niha, ya'ia da'ö Samsung Galaxy Tab ba Apple iPad. Itaria so niha sangoguna'ö oi tablet andre tobali fangali komputer laptop, na lafakhai khönia wafa wanura (li Indonesia: papan ketik) faoma ni'ote'u (li Indonesia tetikus). Faigi oi gambara tablet simane ba galeri tou ba gahe zura andre.

Oroita wehede

Fehede tablet lahalö moroi ba döi gara wanura ni'oguna'ö me föna ba wanura hadia ia fatua lö ni'ila niha hewisa wamazökhi karate. Duma-dumania lasura hikaya Gilgamesh ba dete gara wanura (faigi gambara tou). Molo'ö ndra ere zura, Gilgamesh andre no tobali dane-dane wanura ösa hikaya si so bakha ba zura Gamabu'ulali Siföföna simane hikaya molö sebua awö hikaya nowo Noakhi.^[1]

Irugi ndröfia si-70 so ndraono sekola ba Danö Niha nasa sangoguna kara wanura börö me mo'amböta garate wanura me luo da'ö.^[2]

Tola taŵa'ö wa da'a zindruhu kara wanura ma tablet. Ni'oguna'ö niha ma'ökhö tenga tablet nifazökhi moroi ba gara bahiza nifazökhi moroi ba galasi elektronik, irege tola taŵa'ö ia tablet elektronik ma abölö faudu komputer tablet.