Desktop

Sambua komputer desktop sotöi HP 9000, nifazökhi sambua perusahaan sotöi HP (Hewlett Packard). Boto komputer andre tola lafeförö (kambera) ma zui lafasindro (kambölö).

Desktop ma komputer desktop no sambua ngawalö komputer si lö ebua sibai irege tola tefedadao ia ba dete meza (li Inggris desk eluahania meza, top eluahania tete). Ba mböröta me awena tefazökhi komputer, egebua sibai ia, tola ifönui sambua wuröma sebua. Irugi ma'ökhö te'oguna'ö nasa komputer segebua simane andre nifotöi mainframe ba wohönagö ngawalö fefu informasi si tola lahalö ya'ira niha sato, töra-töra ba internet.

Heŵa'ae tebörögö so komputer digital me 1941 me tefazökhi komputer modern si föföna sibai (nifazökhi insinyur Jerman sotöi Konrad Zuse ba nibe'e töi Z3), awena 30 fakhe aefa daö tebörögö mufazökhi komputer sabölö ide-ide si tola tefedadao ba dete meza. Me 1977 tefazökhi tölu komputer desktop si föföna sibai, ya'ia Apple II, TRS-80 ba Commodore PET.

Ilau mohalöŵö niha andre ba komputer side-ide nifotöi laptop si so ba hagitania. No ide-ide ia fagölö wa'ebua kompter andre ba mbuku si so ba zingania. Andrö asese göi lafotöi komputer andre notebook.

Furi hö tefazökhi komputer sabölö ide-ide ba anifi-nifi irege tola tefedadao ia ba hagita, andrö wa lafotötöi ia laptop (li Inggris lap eluahania hagita, top eluahania tete) ma zui notebook (li Inggris notebook eluahania buku wanura).

Börö me desktop ba laptop no ngawalö komputer si tola la'öli ba la'okhögö ero niha, andrö wa lafotöi ia personal computer ma PC (li Inggris personal eluahania si tefaböbö khö samösa niha).