Wikipedia:Fanofu sasese musofu (FAQ)
Standar wanura ba li Niha
[bulö’ö kode]Faigi ba Standar wanura. Standar andre te'oguna'ö ba Wikipedia, ba Wikikamus awö ba Wikibuku.
Aurifö, urifö ba utu ndru'u
[bulö’ö kode]Urifö
[bulö’ö kode]Urifö no sauri ba danö ni'uri niha (moroi ba wehede manguri, eluahania mamahöna ö ma mame'e balazo). Böi tötöi urifö zauri ba danö bö'ö si tenga ni'uri niha simane sökha, arawi, harimo, btn.
Aurifö
[bulö’ö kode]Te'oguna'ö wehede aurifö khö fefu zaliŵa-liŵa ba danö si tenga niha ba sinumbua. Fao bakha ba da'ö fefu gurifö ni'uri niha, fefu zauri ba ndru'u ba ba gatua, fefu zauri ba hogu geu simane fofo, ba fefu zauri bakha ba nidanö ba bakha ba nasi.
Utu ndru'u
[bulö’ö kode]Me ifo'eluaha Zura Ni'amoni'ö ba li Niha Heinrich Sundermann, i'oguna'ö wehede "utu ndru'u" tobali töi fefu zaliŵa-liŵa ba danö (li Indonesia "binatang", li Inggris "animal").
Hiza töi utu ndru'u ambö faudu ba wanötöi fefu zaliŵa-liŵa ba danö me utu no töi zaliŵa-liŵa ba danö side-ide sibai. Lö faudu tatötöi harimo, singo ma gaza tobali utu ndru'u, börö me egebua sibai ira.
Baero da'ö aurifö bö'ö simane i'a ba nasi, lö auri ira ba ndru'u, eluahania tenga utu ndru'u ira. Simanö göi wofo sauri ba hogu geu, tenga utu ndru'u ira.
Andrö wa abölö fagöna na tatötöi aurifö fefu zaliŵa-liŵa ba danö, he sauri ba nomo ni'uri niha, he sauri ba ndru'u, ba gatua, ba hogu geu, bakha ba nidanö ba bakha ba nasi.
Sinanö ba sinumbua
[bulö’ö kode]Sinanö
[bulö’ö kode]Lafotöi sinanö fefu zauri nitanö niha ba danö simane fakhe, gae, rigi, ngawalö mbunga nitanö niha, btn. Fehede sinanö tehalö moroi ba wehede mananö, ya'ia da'ö mamazökhi sambua dögi ba danö ba mame'e danömö ma zui famasua bakha.
Sinumbua
[bulö’ö kode]Lafotöi sinumbua fefu zauri ba danö nifotöi tumbuhan ba li Indonesia. Bakha ba zinumbua tefaogö he sinanö nitanö niha ba he sauri ba danö bö'ö si tenga nitanö niha. Lu'u duma-dumania tenga sinanö, bahiza sinumbua situmbu ba döla geu. Simanö göi zilimo, simalambuo, i'iŵa, btn.
Fehede si lö fangali ba li Niha
[bulö’ö kode]Hewisa wanguma'ö fehede si lö fangalinia ba li Niha?
So dombua lala. Sara: faigi ua na sindruhu lö fangalinia ba li Niha. Itaria so ha i lö itörö tödöda. Duma-dumania fehede walaupun ba kendati demikian tola te'ali faoma fehede heŵa'ae ba heŵa'ae simanö.
Simanö wehede mungkin ba barangkali tola muŵa'ö faoma te. Duma-dumania: mungkin belum siap > te lö na awai; barangkali mereka lagi terlambat > te ahaya ira.
Simanö göi wehede jadi tola te'ali faoma börö da'ö ma zui eluahania. Duma-dumania, Mereka terlambat, jadi kita pulang saja > Ahaya ira, börö da'ö mangawuli manö ita, btn.
Duma-duma tanö bö'ö fehede daripada, tola te'ali ia faoma fehede moroi na.
Dua: na sindruhu lö fangalinia tandraigö wanguŵa'ö ya'ia faoma duma-duma.
Tölu: mangoguna'ö fehede nifotöi. Faigi nisura andre, "Asu no sambua gurifö si tefaböbö ba ngafu nifotöi mamalia" Börö me lö töi mamalia ba li Niha te'oguna'ö wehede nifotöi. Eluahania moroi na musura ngafu mamalia, tesura ia ngafu nifotöi mamalia.
Öfa: na lö fangalinia ba lö göi lala wanguma'ö ya'ia tanö bö'ö, na simanö halö manö wehede moroi ba li Indonesia andrö tobali ia li si bohou ba li Niha (lafotöi kata pungut ba li Indonesia), duma-dumania fehede teknik, demokrasi, tim, konsisten, mesin, efisien, tip, magis, karisma, btn.
Mufa'anö Wikipedia/Wikikamus/Wikibuku andre tobali börö wangi'ila ba generasi digital si no to'ölö ba li Indonesia ba itaria na i ba li Inggris. Na lö lala wangali ya'ia ba lö moguna tasösö sibai, börö me fangi'ila si so ba Wikipedia/Wikikamus/Wikibuku andre lö edöna labaso ira tua ba aweda sahilu lela ba wamoligö ngawalö wehede andrö.
Simanö göi li Indonesia. No ihalö oya wehede moroi ba li Latin, Portugis, Melayu, Arab, Jawa, btn. Simanö li Inggris, sangai oya wehede moroi ba li Yunani, Latin, Jerman btn.
Na omasi ita li Niha tobali li ni'oguna'ö ba ngaotu ndröfia si-21 si lö tola lö'ö ihalö ösa wehede moroi ba li bö'ö.
Si fakhai ba administrasi wamatörö
[bulö’ö kode]Hadia desa ma banua?
Fagölö ira provinsi, kabupaten ba kecamatan, si lö tola lö'ö ta'oguna'ö wehede desa na andrö niŵaö dödöda administrasi wamatörö.
Moguna mutöngöni wa desa lö fagölö ira mbanua. Itaria so mbanua sabölö ebolo moroi ba zi sambua desa, ma zui sambua desa sabölö ebolo moroi ba zi sambua banua. Desa andrö no nifataro wamatörö Indonesia. Nifotöi banua no so ia fatua lö merdeka Indonesia!
Kecamatan ma öri?
Fagölö ira zanandrösa ba desa andrö yaŵa, te'oguna'ö wehede kecamatan na andrö niŵa'ö dödöda sambua mbolo administratif wamatörö. Na andrö tö niŵaö dödöda bolo nöri si so me föna fatua lö merdeka Indonesia ba ta'oguna'ö wehede öri.
Kapupaten ma kabufate?
Oguna'ö manö wehede kabupaten ena'ö fagölö fefu.
Famatörö ma famareta?
Satulönia famatörö ma samatörö (pemerintah)! Da'a geluaha wehede moroi ba li Indonesia memerintah. Fehede famareta no nihalö moroi ba wamoligö wehede pe-me-rin-tah (fa-ma-re-ta) tenga famo'eluaha ya'ia.
Ibu kota ma ina mbanua?
Ibu kota no sambua nahia administrasi wamatörö (negara, provinsi, kabupaten ma kecamatan). Ina mbanua no banua sebua. Ena'ö konsisten ta'oguna'ö ibu kota, na andrö niŵa'ö dödöda nahia administrasi wamatörö, ba ina mbanua na andrö niŵa'ö dödöda banua segebua.
Negara ma öri?
Te'oguna'ö wehede negara. Öri tenga sifaudu ba wehede negara, heŵa'ae tehalö ia moroi ba li Melayu negeri. Ena'ö konsisten ba ta'ila göi wa andrö nitötöida famatörö sambua negara nitema'ö negara bö'ö (li Indonesia berdaulat) ta'oguna'ö wehede negara, simane negara Korea, negara Jerman, negara Tiongkok.
Cina ma Tiongkok?
Tiongkok! Ba Wikipedia/Wikikamus/Wikibuku ta'o'ö zi no tobali angetula wamatörö Indonesia me 2014 wa fehede Tiongkok ni'oguna'ö ba tenga China ma Cina sa'ae (faigi Keputusan Presiden Republik Indonesia nomoro 12 ndröfi 2014 sombatogö Surat Edaran Presidium Kabinet Ampera nomoro SE-06/PRES.KAB/6/1967 sanandrösa döi Republik Rakyat China). Molo'ö angetula wamatörö andrö töi negara Tiongkok si resmi tobali Republik Rakyat Tiongkok.
Sudan Selatan ma Sudan Raya?
Ena'ö konsisten ta'oguna'ö döi resmi negara ni'oguna'ö ba li Indonesia. Börö da'ö Provinsi Sumatra Utara tenga Sumatra Yöu, Korea Selatan tenga Korea Raya, Selandia Baru tenga Selandia Bohou, ba tanö bö'önia.
Israel ma Izara'eli?
Na andrö nitötöida negara Israel nifesindro me 1948 ba danö Palestina ba ta'oguna'ö Israel. Na andrö nitötöida sambua negara satua si so me föna ba Zura Ni'amoni'ö ni'ali H. Sundermann ba ta'oguna'ö Izara'eli.
Mesir ma Miserayi?
Fagölö ira yaŵa Israel. Negara modern Mesir tetötöi Mesir, negara satua si so me föna ba Zura Ni'amoni'ö tefotöi Miserayi.
Si fakhai ba döi-töi faoma istilah ilmiah
[bulö’ö kode]Hewisa istilah ilmiah moroi ba li Latin?
Fefu istilah ilmiah lö mu'ali ba li Niha. Börö da'ö Zea mays (rigi) tenga zea mai, Sus scrofa domesticus (bawi) tenga su sokorofa domesitiku.
Na tabali'ö fefu istilah ilmiah ba lela Nono Niha ba lö sa'ae ta'ila dania geluaha wehede simane su sokorofa domesitiku. Na talau zimanö, tobali dania Wikipedia/Wikikamus/Wikibuku ba'a-ba'a wangi'ila, tenga tobali sambua fanolo ba wama'anö fangi'ila ba li Niha.
Hewisa wanura döi-töi niha simane Johannes Gutenberg ma Yohane Gutöbörö?
Satulönia Yohannes Gutenberg! Fefu döi niha tasura ia simane wanura ya'ia ba li Indonesia. Börö da'ö Xi Jinping tenga Kisi Jipingi, Heinrich Sunderman tenga Sundömanö, Thomas Alva Edison tenga Toma Alafa Edisono, ba tanö bö'önia.
Si fakhai ba lala wanura
[bulö’ö kode]Hadia tesura molaza-laza ma molazalaza?
Satulönia molaza-laza! Ena'ö konsisten ita ba wangadölö'ö lala wanura li Niha ba lala wanura li Indonesia, ba Wikipedia/Wikikamus/Wikibuku ta'oguna'ö dandra - ba wamasafi ngawua wehede nifomendrua, simane göi ba li Indonesia: Owögö-wögö, mu'ugu-ugu, atua-tua, ubalo-baloi, ide-ide btn.
Otu fakhe si lalö me teraka Zoera Ni'amoni'ö (moroi khö Sundermann) no mu'o'ö lala wanura nifakhai manö. Ba era digital andre lö moguna tatohugö ia, me generasi digital Ono Niha no to'ölö fahuhuo ba manura ba zi dombua li (Indonesia ba Nias). Duma-dumania hana wa tola tasura ba WA "pelan-pelan ya dek" (so dandra -), ba hiza aefa daö "faigifaigi ba lala, he" (lö tandra -)? Ena'ö konsisten ta'oguna'ö manö dandra wamasafi andrö (tandara -): faigi-faigi ba lala, he!
Hewisa wangoguna'ö nifotöi ...?
Asese lö fangali wehede moroi ba li Indonesia ba li Niha. Börö da'ö itaria ta'oguna'ö lala wanguma'ö nifotöi. Duma-dumania na omasi ita tasura zanandrösa ba "wamatörö niha sato ma nifotöi demokrasi", ta'gouna'ö "nifotöi demokrasi" ena'ö aboto ba dödö zombaso wa nitötöi dödöda me tasura "famatörö niha sato" andrö no demokrasi, moroi ba li Yunani dēmos (sato) ba kratos (famatörö).