Arisman Zagötö

Arisman Zagötö
Arisman Zagötö
	Arisman Zagötö
Tumbu	Arisman Zagötö; February 1, 1960 (ndröfi 64); Telukdalam, Nias Selatan, Indonesia
Soi	Indonesia
Halöŵö	Pegawai Unilever/Suzuki; Sanura sinunö; Sanunö; Anggota DPR;
Fo'omo	Hati Karnila Laia (m. 1990)
Iraono	4
Satua	Atani Zagötö (ama); Sisati Sarumaha (ina);
	Karier musik
Genre	Pop; Folk pop; Soft rock;
Instrumen	Vokal; Gitar;
Tahun aktif	1976–iada'a
Label	P.T. Hanofa Duta Pertiwi
Artis sifakhai	Avore Nias; Afoda Nias;

Arisman Zagötö (★ 1960 ba Telukdalam) no samösa zanura sinunö pop^[1] moroi ba Danö Niha si tehöngö börö album zinunö Avore Nias^[2] ba börö me no göi irai tobali ia anggota DPR awö wa ni'osatuagö ia ba gotalua Ndraono Niha he ba Jakarta ba he ba Danö Niha.

No ahatö Arisman ba zinunö pop i'otarai wa'ide-idenia, me sahatö khönia no göi sanura sinunö pop simane Syamsul Bahri Zagötö awö Asadin Bu'ulölö (anggota band The Beach Boys ba Telukdalam) ba Bamböwö Laiya (sanura sinunö Katitiralangi, Oriri Dödögu ba Asi Silimba-Limba). Moroi ba wa'ide-idenia no omasi-masi ia wamözi gitar, mendrua manö wamoli bas.

Ibörötaigö wanura sinunö me kalasi dua SMP ia nasa (möi ia sekola ba SMP BNKP Tohia, Gunungsitoli). Terou dödönia ba wamazökhi sinunö börö wamaigi Yasato Harefa awö Warismar Duha ba Bamböwö Laiya, sasese manunö me luo da'ö ba Tohia ba ba nahia sifasui.

Ngawalö zinunö nifazökhi Arisman no tumbu moroi ba zalua nitörönia ba lala gofanöŵania ero ma'ökhö. Börö da'ö göi abölö omasi ia latötöi ia sanura sinunö (li Indonesia: pencipta lagu) ba tenga ha sokara sinunö (li Indonesia: pengarang lagu). Sinunö Umbu Gögu Idanö duma-dumania, tumbu me itörö wa'afökhö me lö nasa isöndra mbalö halöŵö ba no arakhagö ahori mbalazonia. Simanö göi isura zinunö Alu Manaere Luo me falukha ia samösa ina ba mbenua, samaehagö fa'abu dödö khönia börö me no alömö nono awö dalifusö bö'ö khönia ba wa'ahöndrö göfa Samaeri, heza mate 103 niha.

Fahuhuosa khö Arisman Zagötö (1)

Fahuhuosa khö Arisman Zagötö (2)

Amuata zinunö

So tölu ngawalö zinunö nifazökhi Arisman molo'ö famözi ya'ia:

sinunö sabua sabölö fatete wamözi ya'ia (nifotöi beats ba li Inggris), same'e manari niha (fakhili ba zinunö rock ma disco).
sinunö saoha same'e omuso dödö si no mufaogö mene-mene, duma-dumania sinunö Törö Dödöu, Me Awuyu Ndra'o Meföna, btn.
sinunö nisura molo'ö ngenu-ngenu ma lailö Nono Niha.

Molo'ö lala wamözi andre no oya zinunö nisurania sanadrösa ba zalua nitörö ba ni'ilania ba wa'auri si'ero ma'ökhö. So zinunö nisura sanandrösa ba zikho sebua simane fa'ahöndrö göfa Samaeri (sinunö Alu Manaere Luo), ma zui sanandrösa ba wa'auri nitörö ndra sohalöŵö ba kabu sawit ba Pekanbaru (sinunö Pekanbaru), ba so göi sanandrösa ba wa'omasi ndramatua-ndra'alawe saekhu ba lala (li Indonesia: lagu cinta).

Baero da'ö so göi zinunö samaogö mene-mene ba zihino töla simane Böi Fatahi-tahi, ma zui Törö Tödöu ba sogöi zamaogö degu-degu ba zamatörö simane sinunö Niŵa'öu No Öŵa'ö Zui ma sinunö sange'esi lala si tekiko ba Danö Niha (latahigö ita iraono furi).

Samarou tödö

Ba ginötö sekola ia ba Jakarta, toröi Arisman ba kos (sambua furöma nibu'a sewa ero waŵa). To'ölö lafondrondrongo zinunö moroi ba Danö Niha ba tape recorder. Bahiza ifalali zinunö li Niha andre awönia, ero latörö föna nomo ira niha Batak.

Andrö isofu Arisman, hana wa ilau da'ö. Imane khönia awönia andrö wa aila ia larongo niha Batak zinunö li Niha me oi sinunö fa'abu dödö ba lö göi sökhi wama'anö ya'ia.

Moroi ba da'ö ifabu'u Arisman, wa ba zi so föna dania ba lö aila sa'ae Nono Niha wamarongogö zinunö li Niha, no fagölö sökhi ia ba zinunö bö'ö simane zinunö Batak, ba ba zi sagörö Tanö Niha oi laforongogö niha zinunö pop Nias.

Ena'ö alua zimanö, moguna lafazökhi zinunö li Niha si tola moadu wo'anunöisi ya'ia ba fagöna göi woraka ya'ia. Na alua zimanö ba tola tobali populer zinunö.

Ba no ifalua da'a Arisman awö ndra sanura sinunö bö'ö moroi ba Danö Niha, irege iada'a sinunö li Niha no tobali sinunö sabölö lafarongogö niha gofu heza, si lö göi aila ita wo'anunöisi föna niha bö'ö.

Famazaewe sinunö

Ba ginötö da'ö lö nasa so YouTube, heza tola alio lafazaewe zinunö niha. Aefa laraka zinunö ba kaset, silötolalö'ö i'onoro samösa kaset zinunö andrö, i'ohe ba Danö Niha.

Aefa irugi Gunungsitoli möi ia ba gödo wangoroma'ö filem (li Indonesia: bioskop) si so nasa me luo no, i'andrö khöra ena'ö lafarongogö zinunö Avore Nias fatua lö labörötaigö wamafuyu filem. Baero da'ö möi ia göi ba zolohe moto silalö ba Idanögawo ba ba Telukdalam, i'andrö ena'ö lafarongogö zinunö Avore Nias götö wofanö ba lala.

Börö ngawalö nifaluania andre tobali tehöngö ngawalö zinunö Avore Nias, ba tola tefamawa töra 20.000 ngawua kaset Avore Nias. Furi da'ö tohare Si'aya, sokhö Mardiana, ba wangandrö ena'ö fao göi ira ba wamawa kaset Avore Nias. Moroi ba da'ö sinunö Avore Nias tobali sinunö pop, eluhania ato niha somasi-masi mamondrongo ba mo'anunöisi ya'ia (li Indonesia: populer).

Album zinunö

Avore I, 1985 (Arisman Zagötö, Senny Zebua, Arna Daely)
Avore II (Arisman Zagötö, Hati Karnila Laia)
Avore III
Afoda Nias (Arisman Zagötö, Yusmar Laoli, Hati Karnila Laia, Lisbeth Zebua)
Faigi Röfa
Asi Silimba-limba (Arisman Zagötö, Wati Lase, Havino S Duha)

Fefu album andre yaŵa mufa'anö falulu halöŵö khö ndra sanura sinunö bö'ö moroi ba Danö Niha.

Karir

P.T. Unilever Indonesia (1982-1989)
P.T. Indomobil Niaga Internasional (Suzuki) (1990-2011)
Anggota DPR RI (2004-2009)

Buala

Buala nibe'e Pemda SUMUT khö Trio Legend, 2020^[3]

Faigi göi

Sinunö Pop ba Turia Somusodödö
Sinunö Nias ba Inkulturasi Gereja
Mardiana ba Fa'amuzaewe Zinunö Pop ba Danö Niha
Band Simaenaria
Bate'e Brothers
Potret Musisi Nias: Havino S. Duha
Potret Musisi Nias: Man Harefa
Potret Musisi Nias: Yas Harefa

Umbu

↑ Fehede pop no adogoa wehede populer, eluahania fondrege mozawili ia ba ato niha somasi-masi mamondrongo ba mo'anunöisi ya'ia.
↑ Tehalö nisura ba nga'örö andre moroi ba wahuhuosa khö Arisman Zagötö yaŵa ba gu'ö Zoom me 28 Mei 2024, si no mu'irö'ö yaŵa ba Commons. Faigi khai-khainia ba nga'örö andre.
↑ Tebe'e mbuala andre me lafalua sambua program nibe'e töi Sarawongi Ba Danö Niha, nifalua ba Hotel Danau Toba me 2020. Ba program andre lalau manunö ya'ira nifotöi Trio Legend, ya'ia da'ö Arisman Zagötö, Fati Zebua ba Man Harefa, si no mohalöŵö töra 30 fakhe ba wondrou'ö zinunö pop ba Danö Niha. Ba acara andre te'owuloi gefe Rp 100 juta ni'amualagö khö Museum Pusaka Nias.

[1] Fehede pop no adogoa wehede populer, eluahania fondrege mozawili ia ba ato niha somasi-masi mamondrongo ba mo'anunöisi ya'ia.

[2] Tehalö nisura ba nga'örö andre moroi ba wahuhuosa khö Arisman Zagötö yaŵa ba gu'ö Zoom me 28 Mei 2024, si no mu'irö'ö yaŵa ba Commons. Faigi khai-khainia ba nga'örö andre.

[3] Tebe'e mbuala andre me lafalua sambua program nibe'e töi Sarawongi Ba Danö Niha, nifalua ba Hotel Danau Toba me 2020. Ba program andre lalau manunö ya'ira nifotöi Trio Legend, ya'ia da'ö Arisman Zagötö, Fati Zebua ba Man Harefa, si no mohalöŵö töra 30 fakhe ba wondrou'ö zinunö pop ba Danö Niha. Ba acara andre te'owuloi gefe Rp 100 juta ni'amualagö khö Museum Pusaka Nias.

[1]

[2]

[3]