Suster SCMM

Suster SCMM ma Kongregasi SCMM (itaria göi lakaoni ia ba li Indonesia Suster Belaskasih) no sambua wa'awösa fa'alowalangi bakha ba Gereja Katolik, ya'ia da'ö ira'alawe sangoniagö fa'aurira khö Keriso, irege latehegö lö okhötara samösana, lö mongambatö ira, ba löfaröi ira ba wa'awösa fa'alowalangi si tefaböbö ya'ira. La'aro'ö oi da'a me möi ira ba hölu si lö mamalö.

So ndra suster SCMM andre ba zi önö nahia ba Danö Niha: Amandraya, Hilini'ondrasi, Telukdalam, Gunungsitoli, Tuhemberua ba ba Lahewa. Tuho halöŵöra ya'ia mamatörö sekola (TK, SD, SMP, SMA) awö klinik (RSU Stella Maris ba Telukdalam ba Klinik Tabita ba Gunungsitoli).

Ifasindro kongregasi SCMM andre (ba furi hö kongregasi CMM) me 1832 P. Joannes Zwijsen ba Tilburg, Belanda. I'ila wa arakhagö fefu niha samati si so ba paroki khöra^[1] no niha simanga gazi nigazi ma'ö-ma'ökhö, irege lö aetu lumana ira, heŵa'ae abölö mohalöŵö ira. Tuho halöŵö ndra suster SCMM ba frater CMM andre ba wame'e famahaö khö ndraono niha si lumana ba ba wamaeri niha sofökhö.^[2] Andrö göi mbörö wa asese lakaoni ira "suster belaskasih" irugi ma'ökhö.

Iada'a no so ndra suster SCMM andre ba zi sagörö ulidanö: Belanda, Belgia, Brasil, Indonesia, Filipina, Britania Raya, Timor Leste ba ba Amerika Serikat.

Me Juli 2023 tefili Sr. Sofiani Warasi, SCMM, samösa Ono Niha moroi ba Gidö, tobali sondrönia'ö khö ndra Suster SCMM ba zi sagörö ulidanö (li Indonesia: pemimpin umum).^[3]

Tola ta'ila hadia tefaböbö samösa suster ba wa'awösa andre na labe'e furi döira SCMM, simane töi suster moroi ba Gidö andrö yaŵa Sr. Sofiani Warasi, SCMM.

Khai-khai baero

Suster SCMM ba Indonesia: https://www.scmm.or.id
Nahia so ndra Suster SCMM ba Indonesia: https://sistersofcharity.nl/en/indonesia

Faigi göi

Umbu

↑ Lafotöi paroki sambua administrasi mato ha'uga gereja ba mbanu-banua misa (latötöi ia stasi ba Danö Niha) bakha ba Gereja Katolik. Lafotöi stasi sambua gereja Katolik si lö toröi khönia samösa ere (latötöi pastor). Ha ba paroki toröi ndra pastor.
↑ Who are we?, mufaigi me 24/09/2023. (Li Inggris)
↑ The new general council, mufaigi me 24/09/2023. (Li Inggris)

[1] Lafotöi paroki sambua administrasi mato ha'uga gereja ba mbanu-banua misa (latötöi ia stasi ba Danö Niha) bakha ba Gereja Katolik. Lafotöi stasi sambua gereja Katolik si lö toröi khönia samösa ere (latötöi pastor). Ha ba paroki toröi ndra pastor.

[2] Who are we?, mufaigi me 24/09/2023. (Li Inggris)

[3] The new general council, mufaigi me 24/09/2023. (Li Inggris)

[1]

[2]

[3]