Cerruti
Cerruti ma töinia sindruhu Giovanni Battista Cerruti no samösa niha Italia si no irai ha'uga kali möi manörö ba Danö Niha ba gangahorita ngaotu ndröfia si-20. Onekhe fariawö ia ba niha irege i'alu-alui ia razo Siam (iada'a negara Thailand) me möi ia ba Singapura ba wame'e khönia buala ni'oniagö. Simanö göi onekhe ia fahuhuo, irege onekhe ia fahuhuo ba li Niha ba tobali dane-dane kamus Li Niha–Li Italia nifa'anö Elio Modigliani.[1]
Me luo da'ö heŵa'ae ata'u niha Belanda we'amöi ba Nias Tengah ba mendruamanö ba Nias Selatan, tola möi manörö ba da'ö Cerruti me fahuwu ia ba niha mbanua. Börö me onekhe ia ba li Niha ba fariawö sibai ia ba niha mbanua, andröi göi wa ihalö ia Elio Modigliani me 1886 tobali awönia ba wanöröi Nias Selatan, i'otarai Telukdalam lumalö ba Zirombu, lumalö miyaŵa ba Lölöwa'u arakhagö irugi Lölömatua. Simanö zui dania me 1889 ihalö ia tobali awönia Joachim von Brenner-Felsach ba wanöröi Nias Utara ba wamalua fangosili antropologi.[2]
Aefa iröi Danö Niha toröi ia ba Batavia (töi Jakarta me luo no), aefa da'ö ba Singapura ba ba Penang. Ba da'ö göi tobali ia dania samatörö niha asli Malaysia nifotöi Sakai si toröi ba föfö-negara Perak ba Malaysia, nifataro zamatörö moroi ba Inggris me luo da'ö.
Mate ia me 28 Juni 1914 ba Penang. Latörö-tödö ia ba Italia mendruamanö börö me oya gama-gama moroi ba Asia Tenggara nifa'ohe'önia tobali okhöta mato ha'uga museum ba Italia.
Baero zinura bö'ö nisurania so sambua zinurania sanandrösa ba Nias, ya'iada'ö Nel paese dei veleni e fra i cacciatori di teste dell'isola di Nias (Ba Danö ndra Sokhö Langu ba ba Gotalua ndra Sangai Högö ba Danö Niha), heza itutunö wanöröinia Tanö Niha me 1890/1891.[3]
Basoŵa
- Franceso Surdich, Cerruti, Giovanni Battista bakha ba Dizionario Biografico degli Italiani, Vol. 24 (1980). (Li Italia)
Umbu[bulö’ö kode]
- ↑ Elio Modigliani, Un viaggio a Nias, Milan 1890, nga'örö 654-664. (Li Italia)
- ↑ Joachim Brenner-Felsach, Eine Reise nach Nias: Unveröffentlichte Manuskripte aus dem Museum für Völkerkunde in Wien : Materialien zu Exotismus und Ethnographie, nifa'anö Reinhold Mittersakschmöller, Böhlau 1998. ISBN: 3205989597, 9783205989592. (Li Jerman)
- ↑ P. Forniti (editor), Nel paese dei veleni e fra i cacciatori di teste, Florence 1931. (Li Italia)