Astronomi

Moroi ba Wikipedia
Ae ba navigasi Ae ba wangalui
Simane oroma galaksi bimasakti si so bakha luo ba tanö si so ya'ita nifaigi moroi ba Observatorium Paranal, Chile, sambua nahia wangosili banua si yaŵa nifotöi observatorium.

Astronomi no sambua mbolo ilmu sangosili fefu hadia ia zi so ba mbanua si yaŵa. Ba da'ö faböbö fefu mbotoŵa samasui luo nifotöi planet[1] simane Merkurius, Venus, Mars, btn. fao ba da'ö Ulidanö si so niha. Baero planet so göi luo ba döfi, heŵa'ae luo samösa sindruhunia no döfi.

Angowuloa fefu ndröfi si fahatö si no fa'ohe fefu börö wondröni nifotöi gravitasi lafotöi galaksi. Galaxy si so ya'ita andre lafotöi bimasakti ba li Indonesia bahiza ba li bö'ö lafotöi lala safönu idanö zusu (li Inggris The Milky Way, li Jerman Die Milchstrasse), börö me oroma ia hulö lala safönu haga safusi simane susu (faigi foto galaksi bimasakti ba nga'örö andre).

Fangosili astronomi no tefalua i'otarai ngahönö fakhe me föna, bahiza börö teknologi si so ma'ökhö abölö aoha khö niha ma'ökhö wangosisi fefu ngawalö ndröfi ba zi sambua galaksi.

Baero observatorium (fakake sebua ba wangosiligö banua si yaŵa, li Indonesia teropong) si no mufazökhi ba zi ha'uga nahia ba gulidanö, no göi mufatenge oya wakake wangosili mbanua si yaŵa nifotöi satelit si möi mangörö-hörögö planet ma zui ndröfi.

Baero satelit ba so göi göfa sihombo mbanua si yaŵa (li Indonesia wahana luar angkasa) si no mufatenge ba luo, baŵa ba Mars ba tanö bö'önia. Me Desember 2021 irugi luo "Parker Solar Probe", sambua botoŵa nifatenge NASA ba luo.[2]

Börö me no oi aröu sibai ngawalö ni'osili andrö ba mbanua si yaŵa, lö lala wangosili ya'ia simane si to'ölö mufalua ba danö. Börö da'ö metode nifalua ndra ere astronomi, lafazökhi ua nifotöi teori. Ba lahaogö wamareso teori andre irege aro sa'ae ia.

Awena molo'ö teori andrö la'omböi göfa sihombo mbanua si yaŵa ba lafatenge, simane me lafatenge Apollo 11 ba mbaŵa me döfi 1969. Bakha ba Apollo 11 andre so Neil Amstrong, Edwin Aldrin ba Michael Collins, irege tobali ira niha si föföna sibai mangundragö mbaŵa me 21 Yuli 1969.[3]

Fefu planet samasui luo molo'ö wetaronia. Merkurius no planet sabölö ahatö ba luo, ba Neptunus fondrege aröu. Ulidanö (Tanö) so ba gotalua Venus ba Mars. Fa'ebua sambua planet molo'ö famaedogönia ba planet bö'ö.

Sangosili astronomi[bulö'ö | bulö’ö kode]

Fangosili astronomi no lalau niha i'otarai me föna, he ba Asia (ira niha Mesopotamia ba Fenisia) ba he ba Eropa (niha Yunani).

Fangi'ila ba geometri moguna sibai ba wondrou wangosiligö mbanua si yaŵa. Niha Yunani Eratosthenes ba Aristachus la'oguna'ö wangi'ilara ba geometri ba wanu'a ulidanö.

Bakha ba mbukunia sotöi "Almagest" isura Claudius Ptolemy wa tanö si so ya'ita andre no fusö galaksi bimasakti (lafotöi ia teori geosentris), eluahania luo, planet ba ndröfi oi mamasu-masui danö. Teori andre fatema ba niha töra sambua ngahönö fakhe wa'ara.

Awena dania ba ngaotu ndröfi si-16 ifa'olo nifotöi teori heliosentris Nicolaus Copernicus sauri ba Polandia 1473-1543. Molo'ö teori andre, tenga luo zamasu-masui danö, bahiza tanö awö planet zamasu-masui luo.

I'anema'ö fatema teori andre ba gotalua ndra sangi'ila ba matematika ba zi sagörö Eropa, fao ba da'ö Galileo Galilei, sabölö tehöngö ba gotaluara. I'otarai da'e sa'ae ba no te'oguna'ö wangosili ilmiah ba astronomi.

Luo[bulö'ö | bulö’ö kode]

So dombua mbotoŵa sabölö oroma ba hörö ba mbanua si yaŵa ya'ia da'ö luo ba baŵa. Simane si no muŵa'ö yaŵa luo andrö no fusö fefu mbotoŵa tanö bö'ö si so bakha ba sistem luo (li Indonesia tata surya). Simane ndröfi tanö bö'ö, luo andrö muhaga, ifohaga danö, baŵa ba fefu planet.

Haga luo andrö no moguna sibai tenga ha ena'ö muhaga danö ba tola ta'ila hadia ia, bahiza haga luo andre göi mame ena'ö tefazökhi Vitamin D, soguna sibai ba mboto niha, ba ena'ö tumbu wa'abölö nifotöi energi ba zinumbua ba ba zauri fefu (töi ilmiahnia fotosintesis).

Ba börö me ifagaolo-gaolo ia tanö, andrö wa sambua ngai danö itaria i'otahögö luo (ba börö da'ö humaga danö ba laŵa'ö niha sima'ökhö) ba itaria lö'ö (ba börö da'ö ogömi danö ba laŵa'ö niha sibongi).

Baŵa[bulö'ö | bulö’ö kode]

Baŵa no sambua mbotoŵa samasu-masui tanö. Lö muhaga ia simane planet, bahiza na göna ia haga zino, itimbagö haga andrö hulö zörömi. Andrö wa oroma khöda haga mbaŵa, töra-töra ba zibongi. Fa'ara mbaŵa ba wamasui tanö la'oguna'ö niha ba wangerai inötö ba gulidanö. Sara waŵa eluahania inötö irege ifasui danö sakali baŵa.


Umbu[bulö'ö | bulö’ö kode]

  1. Planet eluahania botoŵa ba mbanua si yaŵa samasu-masui sambua döfi simane luo. Fehede planet tehalö moroi ba Li Yunani planetes, eluahania sanörö-nörö.
  2. NASA Enters the Solar Atmosphere for the First Time, Bringing New Discoveries, nasa.gov (14/12/2021), mufaigi me 28/2/2022. (Li Inggris)
  3. Apollo 11 crew