Töi

Töi no fogaoni nibe'e niha ba zi samösa niha ma zui hadia ia bö'ö soguna ba wamö'öni ya'ia moroi ba niha ma gama-gama bö'ö. Bahiza heŵa'ae fagölö töi ia fabö'ö sa'atö lala wame'e töi ba gaurifö moroi ba wame'e töi ba niha. Lö moguna zoya ngawalö ba wame'e töi nasu, mao, kudo, btn. Lakaoni manö khönia döi sibohou andrö, irege to'ölö ia. Bahiza so lala hada nitörö ba wame'e töi ba niha. Lafotöi ia famatörö töi ba lafalua ia aefa wa'atumbu samösa ndraono. Silö'ö-lö'önia ba wamatörö töi ba ndraono andre, labe'e gö niha ba lafangandrö ba nomo. Da'a nifotöi töi sindruhu.

Baero ndraono sawena tumbu, so nasa niha nifatörö töi ba Danö Niha ya'ia ni'owalu. Labe'e khönia döi wowöli, nifatefe faoma barasi, balaki, ba tanöbö'önia. Töi da'ö nibe'e khö ni'owalu ba lahuhugö ba la'angandröi ira satua mbanua.

Baero döi sindruhu ba töi ni'owalu andre, so göi "döi sebua" nibe'e niha khö ndra balugu ma salaŵa hada awö khö ndra niha si no oya mamalua böwö sebua ba zato. Ba wamatörö töi simane da'a lafalua sambua gowasa. Duma-dumania labe'e döi sebua Göri Alitö khö P. Heinrich Terfrüchte meföna ba Dögizita, börö me no itoloni zi sambua öri si fasui Tögizita ba wangatöla'ö lala sebua si tola itörö moto moroi sitou ba Noyo.

Baero döi sebua simane so göi "döi wa'atumbu mangawuli ba khö Zo'aya" si to'ölö tesöndra bakha ba Zura Ni'amoni'ö. Duma-dumania Aberamo tobali Aberahamo, Sarai tobali Sara, Yakobo tobali Izaraeli, Hosea tobali Yosua, Saulo tobali Faulo, Simoni tobali Fetero, btn. Latohugö hada simane bakha ba Gereja Katolik irugi ma'ökhö. Ba ginötö tumbu ira tobali ono Lowalangi me latema Wanasa Ni'amoni'ö tebe'e khöra döi sibohou nifotöi Töi Fanasa (li Indonesia: nama baptis). Ba ginötö tefaböbö ira bakha ba wa'awösa fa'alowalangi (li Indonesia: tarekat religius) tebe'e göi khöra döi sibohou. Ba na tobali Paus samösa kardinal ba ihalö göi döi sibohou, simane Kardinal Jorge Mario Bergoglio si tobali Paus Fransiskus.

Baero oi fefu ngawalö döi andre yaŵa, so göi döi fogaoni ba wariawösa. Duma-dumania so niha nikaoni Ka'uco, heŵa'ae töinia sindruhu Hezisökhi. Ba so göi döi fangaoha si tobali fangaukhu dödö niha nitandrösaigö töi andrö.

Töi so'eluaha

Meföna to'ölö labe'e döi nono khöra niha ba Danö Niha molo'ö hadia zalua ba wa'aurira fatua lö tumbu nono andrö. Duma-dumania labe'e töi nono khöra niha Fa'atulö, börö awena lahalö wa'atulö ba ginötö tumbu nono andrö ba ma zui latötöna ena'ö so wa'atulö khöra. Labe'e töi nono khöra niha Amenesi, börö me manötöna ira wa tobali ia dania niha same'e mene-mene he ba nomo ba he göi ba mbanua. Simanö döi bö'ö simane Fanörötödö, Balazi, Sökhi'aro, btn.

Iada'a itugu alö niha solau simane. Itugu ara itugu lahalö manö döi sami ba wamondrongo moroi ba li Indonesia ma Inggris, tenga sa'ae töi so'eluaha ba lala wa'auri sambua soroiyomo simane ngawalö döi no mege yaŵa. Andrö labe'e manö khö ndraono khöra döi simane David, Krisanti, Pamungkas, btn.