Michelin Guide (buku)

Moroi ba Wikipedia
Ae ba navigasi Ae ba wangalui
Buku Gide Michelin moroi ba ndröfi 1929

The Michelin Guides (ba Li Prancis Guide Michelin) no sambua mbuku sama'oli fefu hotel ma restoran fondrege sökhi molo'ö bosi wa'asökhi nifataro Michelin. Michelin no sambua perusahaan samazökhi gaolo-gaolo moto ma hondra (ban) moroi ba Prancis. Lafotöi ia guide, eluahania fanuturu lala, sanolo niha ba wanöndra heza so hotel awö nahia wamazökhi moto ba hondra. Buku andre tebörögö laraka töra me otu fakhe si lalö. Töinia sindruhu Red Guide, ena'ö tefabö'öni ia moroi ba mbuku tanö bö'ö nifa'anö Michelin sotöi Green Guides.

Waö-waö[bulö'ö | bulö’ö kode]

Me ndröfi 1900 ha ambö 3.000 moto so ba Prancis. Ena'ö tola tedou wamawa moto, ba simanö göi wamawa gaolo-gaolonia, sokhö pabrik gaolo-gaolo moto si fatalifusö Édouard ba André Michelin manura sambua buku si tola la'oguna'ö ira sokhö moto faoma hondra nibe'era töi Michelin Guide.[1] Mato 35.000 ngawua mbuku andrö labagi-bagi khö niha sato lö böli. Bakha ba mbuku andrö lafa'oli gambara danö (peta), nahia heza tola lafalemba mesin moto, hotel awö nahia wamawa wanikha moto si so ba zi sagörö Prancis. Öfa fakhe aefa da'ö, 1904, laraka wanuturu lala si fakhili ba Belgia ba simanö göi ba negara bö'ö ba Eropa.[2]

Me aefa Wasuwöta Sebua I labulö'ö lala wama'anö ösi mbuku Michelin Guide. Iada'a oi lafaosa wama'oli restoran molo'ö kategori, lanönö göi hotel bö'ö (tenga ha hotel si so ba Paris) ba lö sa'ae labe'e bakha iklan.[2] Me itugu tehöngö Michelin Guide, labörögö wama'anö bosi wa'asökhi restoran. Oi lafatenge niha manga ba restoran ba labe'e mbosi restoran andrö molo'ö ni'ilara. Ya'ira andre labini'ö haniha ira, lö la'ombakha'ö khö zokhö restoran wa edöna labe'e mbosi restoran si möi ya'ira. Moguna da'a ena'ö bosi wa'asökhi sambua restoran andrö sindruhu ba obyektif.[3]

Bosi wa'asökhi[bulö'ö | bulö’ö kode]

Sambua restoran sanöndra tölu ndröfi, bosi wa'asökhi restoran fondrege alaŵa.

I'otarai me ndröfi 1936 lafataro mbosi wa'asökhi sambua restoran ba latandrai ia faoma tandra ndröfi. Itugu oya ndröfi itugu alaŵa mbosi nahia wemanga andrö.[4] [5]

  • 1 star: "Restoran si sökhi sibai ba kategorinia" (li Prancis, Une très bonne table dans sa catégorie)
  • 2 stars: "Sökhi wondrino gö, lö maniasa we'amöi manga ba da'ö" (li Prancis, Table excellente, mérite un détour)
  • 3 stars: "Fondrege wa'asökhi, lö maniasa wangehao ba we'amöi ba da'ö." (li Prancis, Une des meilleures tables, vaut le voyage).



Umbu[bulö'ö | bulö’ö kode]

  1. Mayyasi, Alex (2016). Why Does a Tire Company Publish the Michelin Guide?. Mufaigi me 27 Baŵa si dua 2021.
  2. 2,0 2,1 Yerica Park (2019), The History of the Michelin Guide, (Li Inggris), mufaigi me 27 Februari 2021.
  3. MICHELIN Guide Inspectors, (Li Inggris), mufaigi me 27 Februari 2021.
  4. The MICHELIN Guide: 100 editions and over a century of history, ViaMichelin.co.uk, (Li Inggris), mufaigi me 8 Februari 2021.
  5. Michelin Guide History, beyond.fr, (Li Inggris), mufaigi me 8 Februari 2021.