Wu Sangui

Moroi ba Wikipedia
Ae ba navigasi Ae ba wangalui
Gambara Wu Sangui

Wu Sangui (labaso Wu San-kuei; fanura ba Li Kehai 吳三桂) no samösa högö zaradadu ba ginötö mamatörö nga'ötö Ming (dinasti Ming) ba danö Sina. Ya'ia andrö ba tehöngö si'ai börö me ya'ia samösa sanolo soi Manchu ba wanga'i famatörö ba danga nga'ötö Ming. Me no mamatörö ira, ba i'anemai'ö lafasindro wamatörö sibohou sotöi Dinasti Qing.[1] Sahöli dödö niha khonia, lö ara me no lafasindro dinasti si bohou andrö, ba ifuli ilau molawa Wu. Imane wanguma'ö omasi ia ifasindo zui dinasti Ming.[2]

Fa'auri[bulö'ö | bulö’ö kode]

Tumbu Wu ba ndröfi 1612. Ebuabua ia ba ngambatö zaradadu (keluarga militer) bakha ba dinasti Ming. Fao ia khö namania ba wanarogö ola danöra ba möfi si fasui. Baero Göli Kara Sebua si tobali ola danö ndra Kehai ba soi bö'ö, ibörögö mangabölö ba mangebua zaradadu niha Manchu. Asese ladönisi ia ena'ö fao khöra, ba lö irai i'o'ö. Ba zi samuza ma'ökhö, Wu andrö tobali bohalima ba gowuloa zaradadu sanarogö ola danö ba nahia sotöi Töröŵa Shanhai. Ba zi tambai döröŵa andrö so danö niha Manchu sotöi Manchuria.[3] He ŵa'ae ibörögö alö wa'abölö wamatörö kaisaro, lö irai faröi ia moroi ba halöŵö nia.[4]

Fa'adudu dinasti Ming[bulö'ö | bulö’ö kode]

Ba ndröfi 1644, Beijing, ina mbanua Sina, aekhu ba danga samarukhu sotöi Li Zicheng. Ifaehagö wa'atesindro dinasti Shun.[4] Ba wamarukhu da'ö, lataha nama Wu andrö ba he göi fo'omonia sotöi Chen Yuanyan. Börö me no i'ila wa lö lala bö'ö sa'ae, ihalö gangetula Wu. Ibali'ö ia sanuturu lala khö zaradadu Manchu ba we'amöi ba danöra. Baero da'ö, abölö aolo dödö Wu khö ndrawa Manchu moroi khö Li, si fasambua soi khönia börö me dawa Manchu andrö ba no latema'ö wamahaö Kohucu sifagölö ba wamatinia. No fabö'ö ba mbuabua niforoma'ö Li.[5] Moroi ba zi tambai gaekhula Göli Kara Sebua fasui Töröŵa Shanhai tohare saradadu Manchu ba la'iagö danö Sina.[6] Me no aefa lafabalitoyo saradadu Li ba zaradadu Manchu lö laröi danö Sina. Hiza i lafasindro dinasti si bohou sotöi Qing.[1]

Me no aefa tefasindro dinasti da'ö ba la'amualagö lakhömi sebua khö Wu ira niha Manchu ba lafangoŵalu ia göi khö nono-alawe, ono mbalugura. Ifasindro ngawawara zaradadu aŵö famatörönia samösa ba gaekhula raya danö Sina. Ero'ero döfi göi lafa'ema khönia gana'a ba firö soroi ba gödo kaisaro si bohou.[2] Ba zi hauga fakhe aefa da'ö, me no mangahono dinasti Qing, labörögö laheta wa'abölö gamatöröŵa ba he göi saradadu nifatörö Wu. I'andrö Kaisaro Kangxi khö Wu Sangui ena'ö izarazara wanou'ö tou famataronia khö kaisaro. Lö fatema Wu. Börö da'ö ibörögö ilau ŵamarukhu. Ba gotalua zaradadunia, i'ila wa oya nasa somasi na ifuli tefasindro dinasti Ming. Me 'i'ila da'ö ba tumbu ba dödönia wangoguna'ö ya'ira, imane khöra omasi ia na aheta ndrawa Manchu ba danöra ba ifuli ifasindro dinasti Ming. Mato hadauga ira mbohalima moroi ba dinasti Ming bö'ö lafasindro Famarukhu si Tölu Bohalima (1673-1681). Ba ndröfindröfi si föföna, ba tola ladöni khöra ahatö matonga danö Sina. Hiza i, ba zi lö mutötöna mofökhö abölöbölö Wu irege mate ia ba ndröfi 1678, lima waŵa me no ifasindro dinasti si bohou "Zhou Sebua". Me no mate ia sa'e ba lahuku mate nononia ono matua sia'a, ba ibunu samösa ia ma'uwunia matua.[4]

Ba huhuo zato[bulö'ö | bulö’ö kode]

Lamane ira Kehai ba Sina wa Wu Sangui andrö no oya nifamawania dinasti Sina ha bakha ba ginötö si lö arara. Asese latutunö ba manömanö Gehai wa lö baga gamuata Wu Sangui, lö fa'asökhi khönia ba dinasti Ming, Shun, faoma Qing.[4] Baero da'ö i, tobali sökhi khalakhalania na latutunö hewisa wa'omasinia khö wo'omo nia Chen Yuanyan. Tobali sambua manömanö sasese nitutunö ndra Kehai fa'auri wongambatöra.[7]

Umbu[bulö'ö | bulö’ö kode]

  1. 1,0 1,1 Li,, Dun J. (1978). Ageless chinese : a history. Macmillan. ISBN 0-02-370550-7. nga'örö 308 (ba Li Hagöri)
  2. 2,0 2,1 Li (1978). nga'örö 314
  3. "Encyclopaedia Britannica", Shanhaiguan.
  4. 4,0 4,1 4,2 4,3 "China Fetching", Wu Sangui — A Controversial Traitor in the Ancient History of China
  5. Michael, Franz H. (1986). China through the ages : history of a civilization. Boulder: Westview Press. ISBN 0-86531-725-9. nga'örö 160 (ba Li Hagöri)
  6. Kerr, Gordon (2013). A short history of China : from ancient dynasties to economic powerhouse. Harpenden, Herts: Pocket Essentials. ISBN 978-1-84243-968-5. nga'örö 94 (ba Li Hagöri)
  7. "SHINE", A beauty who changed history