Wikipedia:Sura amilita/33

YouTube no sambua mbolokha gu'ö ba internet heza tola la'irö'ö gambara digital saliŵa-liŵa (video) niha, ena'ö tola lafaigi ia niha bö'ö. Lafasindro ia me ndröfi 2005. Ba mbolokha gu'ö andre tola lafairö, lafaigi ba lafazaewe video niha. Oya ngawalö video nifairö niha ba YouTube: so filem, TV, video musik, video fondrörö niha (li Inggris: entertainment) awö video famahaö (li Inggris: educational), so video sanau ba so göi video sadogo-dogo. Video sabölö oya so ba YouTube, no video nifairö niha zamösana, heŵa'ae so göi video nifairö organisasi ma zui sambua perusahaan media simane BBC, Vevo, Hulu, btn.

Me November 2006 i'öli YouTube Google, ba i'otarai da'ö tobali ia ono perusahaan khö Google. Fa'ebua mbölinia me i'öli ia Google 1,6 miliar dolar Amerika. Tuhe gödonia so ba San Bruno, Kalifornia.

Tola i'irö'ö video ba YouTube ero niha, lö moguna labe'e okosi khö Google. Isöndra harenia Google moroi ba nifotöi iklan ni'oroma'ö gasa-gasa lafaigi video niha.

Börö da'ö itugu oya niha samaigi sambua video (eluahania itugu oya niha samaigi iklan) ba itugu oya mohare Google. Hare nisöndrania andrö ibe'e ösa khö zamazökhi video ma zui khö zangokhögö kanal video andrö (li Inggris: channel).

Andrö göi mbörö wa la'odödögö sibai niha ena'ö video khöra tobali alio muzawili hulö dungö virus (andrö lafotöi da'a viral, eluahania alio muzawili hulö virus) ba oya niha samaigi ya'ia. Itaria ena'ö tola viral ia, lahaogö video same'e tobali dödö niha ma same'e tobali mofönu ato niha ma zui same'e tobali afökhö dödö niha (duma-dumania huhuo sangobousi töi niha ma töi sambua soi, btn.). Itugu tobali dödö niha ma zui mofönu ira, itugu lasura zöndrara ba wanimbagö ösi video andrö, ba itugu owölö-ölö ira wamazaewe ya'ia khö zi fa'ila khöra. (Baso zanandrösa ba YouTube)