Uwu

Uwu, ba danö niha mo'amakhaita ia ba wa'atalifusöta, ba zi sambu-sambua ngafu nga'ötö, uwuda ya'ia da'ö talifusö ninada iramatua lafotöi sibayada ma fala'osa khö namada so'ono ya'ita. Fetaro sibaya ba ngenge hada lafotöi uwu/uwu börö danötanö, ya'ira zi oföna nifosumange na falöwa dalifusöda alawe, ya'ira ngöfi, na bahada ba he ba wa'atalifusöta uwu nifosumange sibai. Naso huhuo simane fangowalu, mazui mame'e nihalö nono mbene'öra, sibaya ma uwu sinangea lasofu li. Uwu ba Li Indonesia Pihak Paman.

Sibaya ba ono mbene'ö

Sibaya, ira talifusö ono matua khö nina, sangosibaya lafotöi ono mbene'ö. Ba huku hada ba danö niha, ono mbene'ö ono matua tola ihalö fo'omonia nono zibayania ono alawe, lafotöi da'ö bakhöda sangawuli banuwu. Ba na ono mbene'ö ono alawe tebai ihalö ia ono zibayania ono matua, alakha.

Sinema Nuwu (sibaya)

Molo'ö goi-goi hada ba danö niha, uwu ma sibaya so zinemara na la be'e nihalö nono mbene'öra. Fa'ebua molo'ö fa'ebua mböwö ni'andröra ba zi'oroi moroi tou ma sangai niha. Na ba ngenoli huku hada Laraga ba danö Niha, sinema nuwu fa'ebua molo'ö Bosi, ba hiza'i tola afönu ba tola göi lö'ö ahori so, molo'ö zi tola i'a'asogö soboto, ba si lö tola lö'ö'i tetötöi fefu döi zinema nuwu:

• Töla aya nuwu : Balaki, Siŵalu, Sese,
• Kalimawa aya nuwu;
• Howu-howu nawö fao;
• Diwo Nuwu;
• Orifitö Nuwu;
• Folu'i bene'ö;
• Faha mbawi walöŵa + asio waha, btn.

Sindruhunia oya nasa döi töi goi-goi hada sinangea labe'e ba nuwu ma khö zibaya ba ginötö labe'e nihalö nono mbene'öra, bagotaluania: tebai zilö'ö sangowalu ira'u danga wo'omo zibayania sifao ösi gokhö kefe ma ana'a.

Buala Nuwu (sibaya)

Uwu ma sibaya, tenga ha manema manö ira, ba so göi noro dödöra zi lö tola lö'ö labe'e khö nono mbene'öra ya'ia da'ö:

• Na lahalö nono mbene'öra ira alawe, ba labe'e mbualara uwu simane: fayo soyo nifobunga-bunga, aya ana'a, galadanga ana'a, laeduru ana'a, nukha (ba labe'e göi khö nina ba khö numönö sinöwu hunö gana'a/fo'omo dalifusö ono matua khö mbene'ö), ba tanöbö'önia.
• Na mangowalu nono mbene'öra ira matua, labe'e mbualara uwu simane: fayo saitö (nöu zangowalu ba ginötö alua walöŵa, laeduru ana'a, nukha, kefe, molo'ö wa'aso.
• Na möi manörö nono mbene'ö khö zibayara, ba sibaya/uwu ibe'e manu khö ndraono mbene'önia simane ono mbawi ma zui manu, btn.