Simalapari

Simalapari ba Danö Niha ya'ia da'ö sambua döi wökhö sino la'ila niha he siso ba danö rato, ba yamendrua sa'ae si so ba Danö Niha. Simalapari andre, tandra nia, so ma'ifu wa'ahole ba mbawania, ahole mbewe, ba na abölö-bölö ba tola tebai mohede, fakaole li. Aefa da'ö wa'oya duria si no tehöngö sanandrösa ba wökhö da'a. So zanguma'ö wa no itafari ia bekhu, irege ahole mbewenia, baero da'ö so zanguma'ö wa no lasawö gamonita si no fati ba zisambua mbanua da'ö, irege lamane wanguma'ö; no ibözi ia si tenga awö, börönia simane manibo'ö idanö side-ide ma laŵa'ö ia kiö ba zitenga nahiania. Fökhö da'a no oya alua ba danö niha, ba simanö göi ba mbanua bö'ö misa. Na lahaogö la faigi wa simalapari andre, fökhö salua ba ndroto-ndroto mbawa hulö zimate dambai ma tola göi latötöi ombuyu-mbuyu(lumpuh), hewa'ae löfagölö sibai, hiza fa'amate dambainia ha ba gamaudu mbawania.

Fakaole Mbawa ma Bell's Palsy

Fökhö simalapari ba Danö Niha, no asese siai göna ba niha, so da'ö aefa sibai mondri ba hele ba zi tanö'owi, ba lö ara aefa da'ö ba göna simalapari. Ba da'a so göi wökhö sotöi Bell's Palsy ya'ia da'ö alua wa'ombuyu-mbuyu ba ndroto-ndroto mbawania irege ahole mbawania. Na lafaigi moroi ba waö-waö wökhö da'a arakhagö fagölö ira zimalapari. Fökhö da'a asese ba niha si so ba dalu nidanö ma sanabina, tola göi göna ba ziso fökhö gulo (diabetes), ba si no so HIV. Börö tanöbö'ö tola alua ba niha si so fa'atebai ndroto-ndrotonia andrö i'narai ba dalu, irege ono andrö sabata ba mofökhö, ba ginötö ndröfinia iotarai fele lima fakhe, ofeta önö ngafulu fakhe (15 tahun - 60 tahun). Bells Palsy ma fökhö zihulö zimalapari andre, tola göi alua ba niha salau, si no so zesokho bakha ba döla högönia, irege fefu ndroto-ndrotonia, fao ndroto-ndroto mbawania, tebai maliŵa, ba möi lala wa'alio göna khönia zimalapari. Ofeta iada'a, no lasöndra ira amada sangila amakhoita ba lala wa'ogaöna mboto, ya'ia da'ö so nuo (saraf) gamaudu mbawa si no sofökhö, na tetutu da'ö ba idugu tebai mbawa andre, ba aekhu ahole, lawa'ö ba khöda no göna simalapari..

Molo'ö si no la'odödögö ira amada ba zohalöŵö ba wamareta, ba simanö göi moroi ba WHO, no lafurugö geluaha wökhö stroke ma sombuyu-mbuyu ba li Niha, ya'ia da'ö wa stroke sambua wökhö sifakhai ba lala ndro ba guto si so ba högö, tola no aboto nuonia, irege ambö ndro sinumalö ba guto..