Lahia soyo

Lahia soyo (li Latin: Zingiber officinale Rosc. var. rubrum) fagölö ira lahia safusi na mufaigi gomböilania, simane ŵa'a, ösi, töla ba bulunia. Fagölö göi la'oguna'ö ia ba wondrino. Ha la'a-la'ania zi fabö'ö ba lahia safusi, he ösi, uli ba ononia sotoho-toho, no oyo. Bahiza'i fabö'ö sibai raso na mufelai nösi lahia soyo, ba abölö mosinga wa'aukhunia ba lela.

Töi ba mbanua bö'ö

• Alia (ba danö Aceh)
• Sipodeh (ba danö Minangkabau)
• Jahi (ba danö Lampung)
• Jae (ba danö Jawa)
• Jhai (ba danö Madura)
• Reja (ba danö Bima)
• Melito (ba danö Gorontalo)
• Pese (ba danö Bugis)
• Sehi (ba danö Ambon)
• Siwei (ba danö Buru)
• Geraka (ba danö Ternate)
• Gora (ba danö Todore)
• Lali ma Manman (ba danö Papua)

Guna

Famadöhö ma dalu-dalu ningo ma sibahö-bahö, fa'ambö mbadu, fangaoha wofanö ndro, fangalösi kolesterol, ba tanöbö'önia. Ni'oguna'ö ya'ia da'ö ösi mbörönia.

Nitöngöni

Tebai ibadu sotabina, ba tebai ibadu iraono sambö dua fakhe. Mosikho! Na'ibadu sotabina, tola adudu nono ba dalu. Na talafo oya mubadu nidanönia, tola göna wökhö fa'aisö/fa'azaza mbetu'a ebua.

Fangehaogö tobali dalu-dalu

Dalu-dalu ningo, sibahö-bahö ba fa'ambö mbadu

Lahalö tölu ngawua nösi mbörö lahia soyo, faebuania fefu na mu'orudugö mato zai adulo manu; laheta guli ba lahaogö wanasai, awena ladökhi, laferaö ba latafi ba nukha si ehao; labe'e nidanönia bakha ba galasi, aefa da'ö lahalö sambua ndrima sa'a, lataba dalu ba taferaö ba dete dafi tesi, lafowöi ba lafaruka ba nidanö lahia soyo no mege; awena lanönö nidanö sanauku-naukhu, irege fa'oyania fefu na no tefaruka mato sambua galasi; awena mubadu.

Inötö si sökhi ba wamadu ya'ia na no aefa manga, tölu kali ma'ökhö, mufatete fondrege wa'ara tölu ngaluo.

Dalu-dalu fangaoha wofanö ndro ba fangalösi kolesterol

Lahalö lima ngawua nösi mbörö lahia soyo, labogö ma laleu ba galitö, böi mu'arakö; lahaogö wangeheta uli, awena labobo ma latiti, ena'ö agaboto ia ma'ifu; baero da'ö lahalö sara döla zarilahia. labogö ma laleu ba galitö, böi mu'arakö; lahaogö wangeheta uli/kaefe-kaefe tanö baero, awena labobo ma latiti, enaö agaboto ia ma'ifu; tehenaigö gulo ano (matonga wa'ebua gadulo manu), asio fa'ebua ngawua rigi, idanö nibadu lima galasi. Na no ahori so, ba awena labe'e nidanö no mege ba mbowoa side-ide si fao gulo ano; labe'e ba dete galitö side-id, lafalökha irugi mo'otu-otu, awena labe'e bakha lahia soyo faoma sarilahia si no mubobo mege no, ba itaria lafalökha, irege idanönia mege no mangalö tobali tölu galasi; awena laheta ba dete galitö.

Inötö si sökhi wamadu ya'ia na no aefa manga; dua kali ma'ökhö (ba zahulö ba ba zibongi); mufatete fondrege wa'ara tölu ngaluo.