Kureta

Kureta si dombua gaolo-gaolo nihundra-hundragö wamofanö ya'ia

Kureta (moroi ba li Melayu kereta nihalö moroi ba li Portugis carreta) no töi fefu fakake si so gaolo-gaolo sebua ni'oguna'ö niha tobali fanolo ba wofanö. So gureta si sambua ma dombua gaolo-gaolo, so zi tölu ma öfa gaolo-gaolo, ba so göi zoya sibai gaolo-gaolo simane moto truk ba kereta api. Baero da'ö so nifofanö faoma ahe (nihundra-hundragö), so nidöni kudo, so nifofanö moto (mesin) sangoguna'ö fanikha, ba so göi nifofanö moto (mesin) sangoguna'ö batere/listrik.

Kureta si ha sambua ma dombua gaolo-gaolo to'ölö latötöi manö ia kureta, he ba li Niha ba he ba li Indonesia. Lafofanö ia faoma ahe, nihundra-hundragö, heŵa'ae so göi nifofanö faoma motor, eluahania so khönia sambua mesin, simane kureta moto, sasese laŵaö "hondra" ba Danö Niha. ba sepeda motor ba li Indonesia.

Baero kureta si dombua gaolo-gaolo, so göi gureta si tölu ma öfa gaolo-gaolo nifotöi beca, na nidöni niha ia, ba nifotöi fadati (kureta kudo) na nidöni kudo ia. Awena so göi nidöni faoma mesin sangoguna'ö fanikha simane moto niha (li Indonesia: mobil pribadi), moto zanörö (li Indonesia: bis), ba moto gama-gama (ba li Indonesia: mobil truk).

Afuriatania so gureta soya gaolo-gaolo ba mo'oto-oto (li Indonesia: gerbong), anau ba oroma hulö malitataru na tafaigi moroi ba zaröu (te tola tatötöi ia "kureta malitataru"?), nifotöi kereta api ba li Indonesia, heŵa'ae lö faudu döi da'ö, me lö lafofanö ia sa'ae faoma alitö (fanunu akho), bahiza faoma batere/listrik.

Tou ba da'e mufatunö sanandrösa ba gureta si dombua gaolo-gaolo nifotöi manö kureta.

Waö-waö

Si föföna sibai manöndra hewisa wamazökhi kureta no samösa niha Jerman sotöi Baron Karl Drais von Sauerbronn si toröi ba Karlsruhe, Jerman me 29 April 1785. So tölu gaolo-gaolo gureta andre khönia ba i'oguna'ö ia tobali lalania ba we'amöi ba wohalöŵö.

Kureta ba Indonesia

Tohare gureta danö nifotöi Indonesia iada'a ba ginötö me hino so ndra niha Belanda. La'ohe gureta moroi ba mbanuara sitobali lala ba wofanö ero ma'ökhö. Meluo da'ö ha ya'ira sohalöŵö zanörö kureta. Furinia tohare göi gureta nihaogö ba danö Inggris (1914), ya'ia gureta simane si so ba Danö Niha nifotöi kureta nona ma kureta sebua, heŵa'ae so göi zanötöi ya'ia kureta sebe.

Ngawalö Gureta

Oya la'oguna'ö gureta niha. So ni'oguna'ö ba wanörö-nörö, ba we'amöi ba naha halöŵö, ba ba so göi ni'oguna'ö ba wahulösa (li Indonesia: lomba balap sepeda) . Ba da'e tou so ngawalö gureta si no tehöngö ba niha ba ginötö wasuwöta ba Indonesia:

1. Hercules nihaogö ba mbanua Aston ba Inggris. Lafasindro fabirinia me 9 September 1910. Somböi ya'ia Edmund faoma Harry Crane. Ha dua wulu a lima rozi gureta niwöwöira.
2. Gazelle nihaogö niha ba Belanda. Willem Kolling awö Rudolf Arentzen zame'e töi "gazelle" andre. Labörögö wamazökhi gureta ba fabiri me 1902. Me 1925 no oya sibai muzawili kureta andre ba so ba gotaluania ni'ohe ba danö nitötöida Indonesia iada'a
3. Raleigh nihaogö niha ba danö Inggris. Ofeta gureta da'a ba danö Nusantara me 1939.
4. Phillips nihaogö niha ba danö Inggris. Töi fabirinia "Phillips Cycles Ltd" ba so ba mbanua Smethwick, Birmingham, Inggris, si no muduhö me 1980.
5. Fongers si tohare ba Nusantara me 1909.
6. Humber Cross nihaogö niha ba danö Inggris.
7. Simplex nihaogö niha ba danö Belanda.
8. Batavus nihaogö niha ba danö Belanda.

Gama-gama gureta

So mato ha'uga gama-gama soguna ba gureta. Sara, dombua gaolo-gaolo (li Indonesia: roda), nitötöi göi lika (li Indonesia: lingkar/veleg). Ba lika andre lafasa khönia bine (li Indonesia: ban), so bine tanö baero ba so bine tanö bakha. Aefa da'ö so falano (li Indonesia: pelana), so re tanga (li Indonesia: rem tangan) awö re ahe (li Indonesia: rem kaki/torpedo) ni'oguna'ö ba wombatogö wa'ategaolo gureta. Awena so rate (li Indonesia: rantai), tudu (li Indonesia: tudung) si so yaŵa gaolo-gaolo ba wanaha tefe-tefe na moteu. So göi zamake loce (li Indonesia: lonceng) ba so göi naha bara (li Indonesia: boncengan).