Kawaii

Moroi ba Wikipedia
Ae ba navigasi Ae ba wangalui


Kawaii (Li Jepang かわいい ma 可愛い) no sambua wehede ba Jepang ni'oguna'ö ba wanötöi aoloma dödö niha ba gofu hadia manö zoroma hulö ndraono sigide-ide, aila-aila, ba sahakhö dödö niha wamaigi. Tola la'oguna'ö ia ba niha, aurifö, ma zui adu simane boneka ba ma zui niha ma botoŵa nidunö-dunö (li Indonesia karakter fiksi). Kawaii andre tebörögö moroi ba danö Jepang ba hiza no göi muzawili ia ba zi sagörö ulidanö.

Oroita wehede[bulö'ö | bulö’ö kode]

Fehede kawaii tehalö moroi ba wehede 顔映し (kao hayushi, bawa (niha) si humaga) si tola te'ali li Niha bawa soroyo-royo börö wa'aila-aila. Fehede hayushi faoma ia -bayu moroi ba wehede mabayui (眩い, 目映い ma 目映ゆい) so'eluaha: töra muhaga ba ha wa'asökhi irege omasi-masi niha wamaigi (ma- tehalö moroi ba wehede 目 so'eluaha hörö). Fehede -hayu tehalö moroi ba omohayui (面映い ma 面映ゆい) eluahania "aila-aila" (omo- moroi ba wehede 面, ni'oguna'ö me föna ba wamotöi "bawa, sikhala, gambara, fa'oroma, khili-khili"). Me ara manö eluahania mu'ese tobali "ide-ide" ma "muhaga" ba famoligö ya'ia tobali かわゆい kawayui irege tobali かわいい kawaii manö.[1][2][3] Si to'ölönia lasura ia ba Hiragana かわいい, ba Kanji, 可愛い. Itaria fanura ba Kanji andrö tefo'eluaha "omasi-masi".

Hikaya[bulö'ö | bulö’ö kode]

To'ölöa andre tebörögö ba gafuriata ndröfia 1960. Ba ginötö andrö, labörötaigö iraono si bohou ebua wondröi hada zatua, lö la be ba dödöra ngawalö do'ölöa si no latohugö ero nga'ötö ba Jepang.[4] Ba ndröfia 1970 labörögö ira ono alawe Jepang manura hurufo segebua sowulo-wulo ba lafaogö göi gambara sami ba hörö simane gambara dödö, mao btn. Lala wanura andre lafotöi Gyaru-Moji, eluahania lala wanura ndraono alawe. Sindruhunia tumbu lala wanura simane börö me ahilu khöra wolo'ö wanura Kanji.

Adu sotöi Hello Kitty tefagamöi me ndröfi 1974 si tobali adu kawaii, sadöni ba dödö niha börö mbawania side-ide ba saila-aila irege omasi-masi ita wamaigi ya'ia. Moroi ba da'ö tebörögö göi to'ölöa kawaii bö'ö irege tobali ia adöniŵa dödö zato he ba danö Jepang ba ba zi sagörö ulidanö irugi ma'ökhö.[5]


Umbu[bulö'ö | bulö’ö kode]

  1. かわいい. 語源由来辞典 (Kamus Oroita Wehede) (Li Jepang). Mufaigi me 28 Baŵa si sara 2021
  2. 可愛い. デジタル大辞泉 (Digital Daijisen) (Li Jepang). Mufaigi me 28 Baŵa si sara 2021.
  3. 可愛いとは. 大辞林第3版(Daijirin Ed. si-3) (Li Jepang). Mufaigi me 28 Baŵa si sara 2021.
  4. Hui-Ying Kerr (2016). Kawaii and the Cultural Rise of Cute. The Conversation. (Li Inggris)
  5. The COMM (2020). The Birth of Kawaii (Li Inggris)