Hele

Hele, (Li Indonesia pancuran) idanö sangele si lö aedu-aedu moroi yaŵa ba nulu. Sito'ölönia ba Danö Niha hele andrö lahaogö ia moroi ba gelea ma umbu nidanö sangele moroi yaŵa ba hili. Fangehaogö hele ya'ia da'ö; laba'a ma'ifu gelea moroi ba lulu ena'ö faonö ma'ifu, awena ba da'ö la'oro'ö mbalö lewuö si no laheta mbu'u, awena lafatohu misitou irugi nahia sahatö ba ngai nomo ma molo'ö wetaro nihonogöi zangotomosi ya'ia. Sito'ölönia fa'alaŵa handroma hele lahaogö töra sandrohu niha. Ohitö dödö ena'ö ohahau dödö zimondri ma sangai idanö ba nasoa (Li Indonesia tempat air dari batang bambu).

Baero hele so göi Ba'a Nidanö ya'ia da'ö elea ma umbu nidanö niba'a enaö faonö tola musou soguna ba wanasa, femondri, ba ba wangai idanö wamo'ösi nasoa ma serege nidanö. So göi mba'a moroi ba danö nikhao si so fa'ebua mato dua mete öfa sagi (2 meter persegi) si tesöndra idanö narö danö (Li Indonesia sumur gali). Fagölö gunara hele naha ba wangai idanö. Hele ma Ba'a, i'otarai föna irugi iada'a la'oguna'ö nasa ba Danö Niha. Heŵa'ae iada'a me no tedou wa'atua-tua niha, na lahaogö hele tenga sa'e moroi ba lewuö, hiza'i lahaogö moroi ba pipa besi ma moroi ba PVC, ba so göi mba'a nikhao sabakha faoma bor.