Filosofi

Filosofi (li Indonesia "filsafat") no sambua bolo wamahaö ba universitas, perguruan tinggi mazui ba seminari sangosili zanandrösa ba wangi'ila niha. Fehede filosofi tehalö moroi ba li Yunani φίλος (philos) eluahania "fa'omasi" ba σοφία (sophia) eluahania "fa'atua-tua".^[1]^[2]^[3] Eluahania niha samahaö ya'ia ba filosofi no samösa niha sangomasi'ö fa'atua-tua, ba börö da'ö, i'osindruhugö-tödö wangalui fa'atua-tua andrö irege isöndra ia.

Ba zilalö bolo wamahaö simane sains, fisika ba psikologi no tefaböbö bakha ba wamahaö filosofi. Ma'ökhö bolo wamahaö andrö no tobali bolo wamahaö samösa sitenga sa'ae si so barö filosofi.

Bakha ba filosofi lafahaö gofu hadia ia zi fakhai ba wangi'ila, simane hana wa so ita ba gulidanö? hewisa wa ta'ila zindruhu na sindruhu ba tenga faya? hadia mbörö wa atoru tou hadia ia ba lö atoru ia miyaŵa, btn. Simane oroma ba da'e ebolo sibai zitobali tuho wamahaö filosofi andrö. Andrö göi mbörö wa so nasa mbolo sabölö falözö barö filosofi, simane epistemologi (samatunö hadia wangi'ila ba hewisa wa tola ta'ila ma tasöndra ia), etika (samatunö hadia zisökhi silötolalö'ö lafalua niha. Asese latötöi da'a ba li Indonesia "prinsip moral"), logika (samatunö hewisa wanöndra fangi'ila, hewisa wamöfö'ö ya'ia, ba hewisa zisökhinia wamaehagö ya'ia) ba metafisika (samatunö fefu ngawalö yefo fisika simane "realitas", "eksistensi", "obyek" ba "sifat").

Oya ndraha filosofi. So nifotöi estetika, filosofi bahasa, filosofi wangera-ngera, filosofi agama, filosofi sains, filosofi matematika, filosofi sejarah, filosofi politik, btn. Börö da'ö, filosofi no tobali dane-dane fefu wangi'ila.

Umbu

↑ Hoad, T. F. (1993). The Concise Oxford Dictionary of English Etymology. London New York: Oxford University Press. ISBN 0-19-283098-8.
↑ Simpson, John A. (18 April 2002). "Philosophy". Oxford English Dictionary: Version 3.0 : Upgrade Version (ba li Inggris). Oxford University Press. ISBN 978-0-19-521889-3.
↑ Jacobs, James M. (14 January 2022). Seat of Wisdom: An Introduction to Philosophy in the Catholic Tradition (ba li Inggris). CUA Press. ISBN 978-0-8132-3465-6. Mufaigi me 7 July 2023.

[1] Hoad, T. F. (1993). The Concise Oxford Dictionary of English Etymology. London New York: Oxford University Press. ISBN 0-19-283098-8.

[2] Simpson, John A. (18 April 2002). "Philosophy". Oxford English Dictionary: Version 3.0 : Upgrade Version (ba li Inggris). Oxford University Press. ISBN 978-0-19-521889-3.

[3] Jacobs, James M. (14 January 2022). Seat of Wisdom: An Introduction to Philosophy in the Catholic Tradition (ba li Inggris). CUA Press. ISBN 978-0-8132-3465-6. Mufaigi me 7 July 2023.

[1]

[2]

[3]