Femanga gahe

Femanga gahe, ya'ia da'ö no sambua wenaeta ma bongi mböwö ba hada salua ba danö niha fetaro, ba zamena mamalua fongambatösa si darua niha, si no mamakhai fatalifusöta ya'ia da'ö tome ba sowatö. Hada ba danö niha andre, so zinumalö föna ba so göi zangawuli furi. Nano sa'ae awai halöŵö fa'omuso dödö ba zi darua niha si no i faböbö ira Lowalangi ni fahowu'ö namada fandrita, ba hiza, no sa'ae ha sambua ira, ba no i'ohe wo'omonia sangowalu ba ngambato zo'ono ya'ia. Na no larugi nomo, ba mahemolu nia, tohare ndra talifusö, sitenga bö'ö ni'owulo larugi nomo numönöra ira matua ma marafule, la tötöi döinia, fame'e roti.

Bosi fatua lö manga gahe

Bosi da'a ba wanohugö manö fa'omasi, ba ngambatö zanga'i niha, me so gamaedola ba danö niha, hönö mböwö no awai, ba hönö mböwö no tosai. Fame'e roti, tefalua fao fa'omuso dödö ba fetaro zanga'i niha so ma'ifu ni henagöra fasumangeta ba zitohare wame'e roti. Mahemolunia ba mazui ba migu da'ö, la fa'ema duria wa tohare ndra matua faoma dongania ba satua sifao khöra we'amöi ba nomo nama nono alawe, bosi da'a latötöi femanga gahe. La'ohe noro danga, bola nafo tebai olifu, ba tanö bö'önia fasumangeta si no la tatugöi ba danö niha. Femanga gahe, he ahatö ba he aröu wetaro nahania, ba hasambalö mörö ba nomo nama nono alawe, ba na larugi atö tanö owi, ba manga sito'ölö manö ba labokai ya'i noro danga ni'ohe numönöra, ba no göi lahenagö la rino gö meno faoma laturiagö fatua lö tohare ira. Mahemolu nia, amena la fahö zi öfa ahe, ma bawi sitobali tandrösa wangandröra ba lala halöŵö we manga gahe da'a, no i börögö la fasafi da'io ö nono alawera. Nano asoso, ba la börötaigö halöŵö sifao fa'omuso dödö, ba faoma la faehagö wa sumangeta, ba hiza no sa'ae tobali ngambatö sifakhai, sitenga bö'ö. Meno awai manga ba no alaŵa luo sa'ae, ba la angonaisi zatua, na no irugi inötö mangawuli ira, ba lahalö fefu zino la henagö ba la be'e khöra sitobali fasumangeta ba gangolifa samösa ono alawera. So zasoso, ba so zauri, sara mate sara auri. Bosi da'a lö zilö alua ba wongambatö ba danö niha.

Hewisa na ba wangarato

Fa'alua wongambatösa nono niha ba danö wangarato tebai ni timba, me oi mozawili fefu we'aso nono niha ba danö rato. Hiza bosi hada, si no mo wa'a ba nono niha, tebai ni olifugö, ba mangawuli hewisa wahasara dödö zi dombua ngambatö ba wangosara'ö hewisa zisökhi lala nitörö. Böwö, ya'ia da'ö masi-masi, irege na so zanguma'ö ebua mböwö la andrö, sindruhunia, wa böwö ni andrö zoboto no fa'omasi me, oi tola lafatunö ba aetu ia ba wa hasara dödö.