Femanga gö ni'amoni'ö

Femanga gö ni'amoni'ö ya'ia da'ö tenga simane femanga si to'ölö nilau niha, so wakhe, sayu, ba ngawalö gö. Hiza femanga da'a femanga nifalua ba gosali ba wanörötödö hewisa wa'omasi Lowalangi ba niha guli danö, Ihöli niha moroi ba huku horö, faoma Do Nia sangele ba döla röfa, ba botoNia ni böbözi no Isalahini niha ba zisagörö ulidanö. Femanga gö ni'amoni'ö sambua tandra ba niha samati sitobali fanörötödö wa'omasi Lowalangi ba zamati khöNia. Na la'ali ba li Indonesia, lamane wanötöi ya'ia: '''Perjamuan Kudus'''.

Ni'oguna'ö ba wemanga gö ni'amoni'ö

Ba wemanga gö ni'amoni'ö, nifalua ba gosali, ero dozi gangowuloa gosali ba Danö Niha, na tefalua lala halöŵö da'a, ba lahenagö roti simöi famaedo mboto Yesu si no teforöfa salahi niha, ba simanö göi lahenagö nagu ma agu nifati wa famaedo ndro Yesu sangöhöli niha ba huku horö saduwa yaŵa ba röfa. Lala wamalua ya'ia ba sangai halöŵö ma ira fandrita, ba sohalöŵö ba gosali, i ohe föna Lowalangi halöŵö andrö, ilau mangandrö, ba i aohasi gölö Lowalangi. Ba fatua lö labadu nagu ba la'a roti, ba ifa'ema daromali sangai halöŵö ba wame'e fa'aboto ba dödö khö mbanua niha Keriso ena'ö femanga gö ni'amoni'ö andre, simöi howu-howu tenga fangelifi. Baero da'ö ba i fa'ema duria wa naso bagotalua zowulo andrö, so zinendre dödö ba khö nawö, khö dalifusö, khö zatua, ba tanöbö'önia, sökhi lahalö ginötö si sabata, ba wangandrö khö Lowalangi ena'ö lö tobali taha-taha howu-howu ba khöra.

Dane-dane wemanga gö ni'amoni'ö

Nifalua zangai halöŵö ba gosali sitefaudu ba wemanga gö ni'amoni'ö, tenga somasi dödöra, hiza no so wamahaö si so ba daromali, simane da'a tou:

1. Matai'o faza dua wulu a önö ayati dua wulu a önö ofeta ayati si dua wulu a ŵalu (Matius 26:26-28)
   • Me manga ira, Ihalö roti Yesu, I'aohasi gölö Lowalangi. Ibe'e roti andrõ khö ndra nifahaö-Nia ba Imane, "Mitema, ba mi'a; boto-Gu da'e."
   • Aefa da'ö Ihalö mako nagu sebua, I'aohasi gölö Lowalangi. Aefa da'ö Ibe'e mako andrö khö ndra nifahaö-Nia, ba Imane, "Mibadu dozi ami.
   • Do-Gu da'e si tobali fangaro gamabu'ula li Lowalangi. Do-Gu nifaduwa salahi zato ba wangefa'ö horöra.
2. Mareko faza fele öfa ayati dua wulu a rua ofeta ayati si dua wulu a öfa (Markus 14:22-24)
   • Me manga na ira, Ihalö roti Yesu I'aohasi gölö Lowalangi. Iboboto roti andrö, aefa da'ö Ibe'e khö ndra nifahaö-Nia Imane, "Mi'a, boto-Gu da'e!"
   • Aefa da'ö Ihalö sambua mako nagu. I'aohasi gölö Lowalangi, ba Ibe'e mako andrö khö ndra nifahaö-Nia. Aefa da'ö labadu nagu andrö dozi ira.
   • Imane Yesu, "Do-Gu da'e sanga'aro'ö fawu'usa li Lowalangi, ba do nifaduwa salahi zato.
3. Sara Korindo faza felezara ayati dua wulu a öfa ofeta ayati si dua wulu a lima (I Korintus 11:24-25)
   • Ba hiza na nifa'emami turia soroi Lowalangi, ba na tohare samösa zi tenga Niha Keriso ma zui niha moroi baero, ba fanuriagömi andrö dania zangoroma'ö fefu horö niha andrö, irege aboto ba dödöra horöra.
   • Lafaehagö fefu zi tobini bakha ba dödöra, ba la'ide'ide'ö ira wamosumange Lowalangi. Lafaduhu'ö wa sindruhundruhu so Lowalangi ba gotaluami.

Ba wa'oya nasa ayati ba daromali Lowalangi andrö, sifakhai ba lala halöŵö wemanga gö ni'amoni'ö.

Tandrösa wemanga gö ni'amoni'ö

Turia somuso dödö moroi ba wemanga gö ni'amoni'ö si no tefaehagö bakha ba daromali ma sura ni'amoni'ö ya'ia da'ö:

1. Sitobali fanörötödö wa'amate Zo'aya ya'ita Yesu Keriso ba zi dua ngahönö silalö ba wangöhöli niha ba huku horö
2. Sitobali dela ba wamaigi fa'auri Yesu moroi ba gotalua wa'amate, ba tefaehagö föna niha, wa'auri silö aetu.
3. Sitobali famaedo wa hasambua mboto niha Keriso hewa'ae no fabö'ö-bö'ö wetaro mboto Keriso andrö ba gangolifa ba wamati.
4. Sitobali famaedo ba fahasambua niha si farisayo khö Yesu ba khö Keriso.