Farago

Farago ma famai rago (li Indonesia sepak takraw) no sambua wamaisa sangoguna'ö bola nihaogö moroi ba nue. La'omai'ö göi niha ba Danö Niha bola rago andre, heŵa'ae ambö la'omai'ö ia moroi ba wamaisa "bola voli" ba "bola kaki". La'omai'ö bola rago faoma ahe, heŵa'ae me föna so göi zangomai'ö ya'ia faoma tanga.^[1] Lala wangomai'ö bola rago andre hulö gangorudua wamaisa "bola voli" ba "bola kaki" nifalua ba nahia wamaisa "bu manu", börö me la'oguna'ö gu'ö nituwu simane na famai "bola voli" bahiza ha la'oguna'ö gahe wamözi ya'ia hulö na famai "bola kaki" ba nahia wangomai'ö ya'ia simane nahia wamaisa "bu manu". Famaisa andre tefatumbu'ö ba Asia Tenggara ba fahulösa fondrege lagohi niha ya'ia da'ö King's Cup World Championships, safuria tefalua ba Bangkok, Thailand. Latötöi farago andre ba Indonesia faoma ba Malaysia sepak raga.^[2]

Waö-waö

Tesöndra wamaisa rago ba Asia Tenggara ni'ohe niha moroi ba Tiongkok, situmbu moroi ba wamaisa tradisional nifotöi "cuju". So göi ba Myanmar wamaisa si fakhili nifotöi "chinlone", si no la'omai'ö töra 1.500 fakhe fa'ara.

No la'omai'ö warago ba danö Melayu i'otarai götö Kesultanan Melayu Melaka. Latutunö bakha ba mbuku Sulalatus Salatin hewisa me tezaumba mböbö högö Raja Muhammad, ono Sultan Mansor Shah Muhammad, börö me göna bola rago nisifa Tun Besar. Ba ginötö wamatörö Sultan Mansur Shah Ibni Almarhum Sultan Muzzaffar Shah (1459—1477), lafofanö moroi ba mbanua nononia matua sotöi Raja Ahmad, börö me no ibunu nono mbalugu Melayu (ba ginötö andrö latötöi ia Bendahara), ha börö-börö watötöisa me lalau farago.

Ba Thailand (töinia föna Siam), no lasöndra lahe wa no la'omai'ö rago i'otarai ba ginötö Kerajaan Ayutthaya.

I'otarai ndröfia 1940-a tebörötaigö wangoguna'ö gu'ö simane gu'ö wamaisa voli ba wamai rago. Ba ginötö andrö göi tebörötaigö lafatörö goi-goi wangerai bua.

Asese latötöi wamai rago ba li Indonesia sepak takraw, ba li Bugis "raga" (niha si farago lakaoni "Pa'Raga"), ba Filipina latötöi ia "sipa", ba Laos lakaoni ia "maradong" ba ba Thailand lafotöi ia "takraw".

Goi-goi

Fagölö goi-goi wamaisa bola rago ba ba wamai "bola voli". Si fabö'önia:

Tebai lawawaya bola rago faoma tanga
Ha 3 kali fatete tola isifa rago samösa sifamai ma zui sambua tim
Naha zifamai lö tefalali
Fa'oya mbua ero sakali famai 21. Bahiza na fa'oya mbua 20-20, möna zisamösa ma sambua tim na isöndra so dombua mbua ba gotalua irugi 25. Na atö larugi mbua 20-20 ibe'e wangombakha "wasit" wa fondrege oya mbua dania 25.
Na faoma atö no irai möna 1:1, ba latohugö wamaisa irege larugi mbua 15 (nifotöi "Tie Break"). Bahiza na atö larugi 14-14, ba moguna latohugö irege tohude 2 mbua, irege larugi 17.

Faigi göi

Khai-khai baero

Gajah Emas balls and equipment Archived 2020-02-21 at the Wayback Machine
TAKRAW ASSOCIATION OF THAILAND Archived 2010-12-13 at the Wayback Machine
Malaysia Sepak Takraw Fan News Archived 2020-09-27 at the Wayback Machine
Sepaktakraw Malaysia
Tamilnadu sepak takraw club Archived 2014-02-21 at the Wayback Machine

Umbu

↑ Itaria ta'ila warago ni'omai'ö faoma tanga ba Danö Niha me föna. Simanö göi ba nahia bö'ö simane ba Banda, si no la'omai'ö i'otarai ngaotu ndröfia si-16 (faigi göi gambara wamaisa farago ba Banda ba nga'örö andre.
↑ Töi "rago" ba li Niha tehalö moroi ba li Melayu "raga" bakha ba döi wamaisa "sepak raga".

[1] Itaria ta'ila warago ni'omai'ö faoma tanga ba Danö Niha me föna. Simanö göi ba nahia bö'ö simane ba Banda, si no la'omai'ö i'otarai ngaotu ndröfia si-16 (faigi göi gambara wamaisa farago ba Banda ba nga'örö andre.

[2] Töi "rago" ba li Niha tehalö moroi ba li Melayu "raga" bakha ba döi wamaisa "sepak raga".

[1]

[2]