Fandru

Moroi ba Wikipedia
Ae ba navigasi Ae ba wangalui

Fandru, wandru sambua wakake ni'oguna'ö same haga fangoroma ba zibongi. I'otarai khö ndra tuada meföna oya ngawalö wandru ni'oguna'ö ena'ö muhaga ba nomo ba zibongi.

Fandru so ha'uga ngawalö[bulö'ö | bulö’ö kode]

  1. Fandru Lewuö: asese lafotöi ia sulu, tehaogö moroi ba da'uli ma lewuö soköli sino mutataba fa'aganaunia mato döfa (1,5m - 2m) mutötö ba mu'otufoi ma mu'okhoi'ö ba zino. Fatua lö mutunu ba la'orodugö mato 3 rozi ba laböbö, ba latawi ba mbuatö awena latunu. Ba narönia labe'e mowa wino ma mowa gae sitobali dane-dane mbo ma akho (Li Indonesia arang) saekhu moroi ba zulu. Fandru lewuö mohola ia i'oroi na no mutunu ba ha aboto lölö afo (± 15 menit) ba ahori zisandrohu. Ba na arakhagö ahori zi sandrohu ba mutunu zui sisandrohu fanetenia molo'ö fa'ara wa'amoguna ba tebai niröi tola akhozi nomo.
  2. Fandru Gitö: tehaogö ia moroi ba gitö baku sowöi moroi ba döla hafea. Latataba mazui lakhokhoi igise-ise ba la'okhoi'ö, fanunu ya'ia labe'e yawa ba dete wiga bele (Li Indonesia piring kaleng) nifodadao yaŵa ba meza, awena lazara-zara wanunu molo'ö fa'ara wa'amoguna.
  3. Fandru Solo Lewuö: götö meno ofeta ba Danö Niha gamawaö wanikha tanö (Li Indonesia minyak tanah) ba laröi sa'e niha wangoguna'ö fandru lewuö ba fandru gitö. Lahaogö wandru solo lewuö. Lala wangehaogö; lataba lewuö ma ta'uli sauri siso mbu'u, ba lafo'ösi fanikha tanö, awena lazozo mbalönia faoma nagole zawu mbanio soköli, aefa da'ö mufatutue enaö abasö nagole zawu nomege fanikha tanö, awena latunu ba muhola ebua. Ero na no alö wa'ebua haga ma hola-hola zolo nomege ba muda'i-da'i wamatutue; ba i'anemaö ebua zui hola-holania, simanö wangogunaö solo lewuö molo'ö fa'ara wa'amoguna.
  4. Fandru Kale: tehaogö moroi ba kale-kale naha susu, naha gi'a kale, ba tanöbö'önia. La ofönai'ö wangehaogö sumbu ba labe'e bakha khönia nuka nisisika mazui afasi nitandraölö/nindrandra, lasigö'ö ba dete kale-kale sino mutögi, awena labe'e bakha wanikha tanö. Nano isösö fanikha (abasö mbalö zumbunia tanö yaŵa awena latunu.
  5. Fandru Ganefo: asese lafotöi ia fandru dindri. Meno ofeta gamawaö fakake nihaogö moroi ba fabiri, nifamawa ba fasa ma ba harimbale, sowanua ba Danö Niha la'öli khöra fandru ganefo. Fandru ganefo no tohöna so naha wanikha tanö, no so zumbu, so kaŵe khai-kainia na musaetagö ba mbagolö sino mufada gosö'osö, ba so göi siporonia moroi ba zörömi. Fandru ganefo tola mu'ebua'ö ba mu'ideide'ö hola-holania molo'ö fa'amoguna. Afusi hagania moroi ba wandru nomero 1 irugi nomero 4 nomege.
  6. Fandru Latera: omböilania arakhagö fagölö ba wandru ganefo, so ya'i gamaehutara na fandru ganefo nikhaigö ba mbagolö, ba fandru latera nitawigö barö mbuatö. Fandru latera asese la'ogunaö ira sifagai ba nasi, börö me lö alio mate ia banangi.
  7. Fandru Gasi: ebua ia moroi ba wandru ganefo, ba simanö göi hagania tara sibai ba afusi, awai ya'i mogoso-goso, ba na no alö wa'atarö hagania ba mufofa mangawuli enaö fasösö khönia bakha nangi. Meföna ba Danö Niha ha ŵaraö niha samake fandru gasi börö me maha mbölinia moroi ba wandru ganefo.
  8. Fandru Lisitiri: Li indonesia lampu listrik, oya ngawalö bola wandru lisitiri nifamawa ba fasa ma ba toko, ba hiza'i fatola auri ia na so arus listrik moroi ba genset, moroi ba PLN, mazui moroi ba batere.

Börö wa'atua-tua niha iada'a oya manö nisöndrara lala ba wanga'asogö fakake ma gama-gama sisökhi soguna ba wa'auri niha.

Umbu[bulö'ö | bulö’ö kode]