Fame'e Nono Nihalö

Fame'e Nono Nihalö no sambua waosatö hada wangowalu nifalua föna luo wa'alua walöŵa. Lafalua ia ba nöri Laraga ba ngaluo fatua lö alua walöŵa. Owulo ndra ina ba zinga ni'owalu, labe'e wamotu khönia ba awena lafe'e ia. Ösi wame'e nono nihalö andre ya'ia fangona safuria ni'owalu andrö khö ndra satuania, talifusönia, ba ira sibayania. Aefa wame'e andre, ba möi nono nihalö i'ondrasi ndra talifusönia, ira'u mbagira ba ilau mangona khöra.

Ngenu-ngenu Nono Nihalö

Simane wamalua wame'e nono nihalö: Lahalö nono nihalö moroi ba mbate'enia ba labe'e ia baulu. No lafonöu ia nukha safusi. Ba lafedadao ia ba gotalua ndra ina sino owulo baulu. Ba i'ondrasi nono nihalö andrö samösa zatua ndra ina, italagui mbagi nono nihalö, möi ia bakha barö nöu ni'owalu ba ilau mangenu ba wangosalahini ni'owalu. Ngenu-ngenu ni'anunösinia sindruhunia ngenu-ngenu dödö nono nihalö. Da'a tou wöfö ngenu-ngenu wame'e nono nihalö andrö.

Ngenu-ngenu ni'owalu si tobali fame'e nono nihalö

Huuu... Ina...
hana izumaigö ndra'o khömi ina
wa mi'ohe ndra'o ba gotalua zatua mbanua ina
  Huuu... ina....
  hadia zalagu si no ufalua
  wa mifabali ndra'o yomo khömi ina
  wa mibözi garamba famofanögu ina
  wa mitema mbawi sebua
  awö mböwö soya ina...
Huuu ina...
hiza dania na mofanödo
haniha dania ngoni-ngonimö ina
sangai idanö na mofökhö'ö ina
solului halöŵö na so domeda le ina...
  Huuuuu ina....
  hiza mbanua nirugigu dania le ina
  no to'ölö ira wombambaya halöŵöra
  alai dania na nihede-hede'ö ndra'o ina
  me ambö fangi'ilagu wö ina
Huuuu ina....
alai na fangeherai ninagu ndra'o
wa fangeherai mbanuada he ina
me lö nekhe-nekhegu wö ina
me lö sifaguru ndra'o
ba lala halöŵö
huuuu ina....
huuuu ina....