Fa Niha Saitö

Fa Niha Saitö sambua mai-mai moroi ba Danö Niha, sarakhagö taya ba ginötö iada'a. Iraono si tumbu ba ndröfi siŵa wulu ofeta dua ngahönö iada'a lö sa'ae la'ila wamaisa simane da'a. No sökhi sibai me so ginötö nasa ba zanura ba Wikipedia Nias tola lasura hewisa ngawalö zalua meföna si lö fakhamö lasura ia, ba hiza tola möi fangi'ila ba ndraono mane ma'ökhö.

Faniha Saitö andre, mai-mai nilau ndraono ba mbanua ba Danö Niha, si oföna ba owulo ira ba lalau fa si, ba wotatugöi haniha zi so ba gendro. Si tefili sangagö gendro, ya'ia dania zangalui sifamai tanöbö'ö si no mamini'ö ya'ia misa. Sahou ofeta ba gendro, ya'ia zikala ba igatini wangago endro si no latatugöi wetaronia.

Faniha saitö tola latötöi göi ia fambini-mbini, irege omuso dödö ndraono sifao ba wamaisa andrö. Mai-mai da'a si no la'ila ba Danö Niha, sambua mai-mai same'e famaha'ö ba zifamai, ba wolo'ö dozi goi-goi si no la osara'ö, ba tenga ha da'ö, ya'ira si famai so khöra woharagoi angetula zato, ba to'ölö ba wanema'ö fa'amöna ba simanö göi wa'akala. Moguna tefatunö ba ndraono mane ma'ökhö ia, ha sitobali ondröita si lö auli itörö tödö dania ba zi so föna, si tobali fa'akayo zinura ba Wikipedia Nias, heŵa'ae lö nasa umbu si tobali zinura andre, ba numalö ginötö te tötöna wa monönö wa'omasi niha moroi ba Danö Niha ba wanura ba gu'ö ba möi famoadu soi Nono Niha.

Fanötöi mai-mai andre, ba gangolifa wehede moroi raya ba hegöi ba gaekhula ma zui atumbukha, tola manö fabö'ö, ba hiza lö mangeheta eluahania si no la'ila dozi niha soroi ba Danö Niha. Ba mbanua bö'ö misa so manö wamaisa sifagölö ha fanötöi zi fabö'ö. Ni tötöna ba zimöi fatome ba gu'ö Wikipedia na so gonönöta ba tefaudu sibai na lanönö, me möi fangatarö ba dalinga niha wa so duria si sökhi si no irai so ba Danö Niha, ba la odödögö ena'ö böi irege taya ia.