Tanö Niha ba UNESCO

Tanö Niha sambua hulo si no sökhi sibai ba na me föna no ambö la'ila niha hulo andre, ba hiza ba ginötö iada'a meno monönö wangi'ila, ba no sa'ae aboto ba dödö niha, wa tenga sa'ae halöŵö sabua ba wangombakha ba niha misa hadia zalua ba zi sambua nahia. UNESCO ya'ia da'ö fangadogo-dogo'ö moroi ba wehede United Nations Educational, Scientific and Cultural Organization sambua mbagia moroi ba gangorudua dozi soi ba zi sagörö ulidanö ma PBB so urusi ngawalö zifakhai ba wa'auri niha ba zisambua mbanua, ba hiza soi Indonesia, la faigi wa soi niha moroi ba Danö Niha, no tola möi ondröita ni rorogö sitebai taya, ba hiza ha wa abölö sökhi na tobali soi ni'ila niha ba zi sagörö ulidanö ba UNESCO.

Sitobali dane-dane wa terou dödö UNESCO andre ba wamili Tanö Niha sambua moroi ba zoya zilö tola lö'ö la rorogö ia, me barö ginötö ba zi hauga fakhe andre, niha moroi ba Danö Niha, no larorogö ngawalö hada, lala wa'auri si no la aurifagö i'otarai mbörö danö tanö mege ofeta ma'ökhö. Si no tobali famatunöra, wa tefili mbanua Bawömataluo si tobali banua si lö olifu gangolifa hada. Ba me ngaluo si önö ba mbaŵa si fulu döfi si dua ngahönö a siŵa (6 Oktober 2009), no tesura döi Desa Bawömataluo, Kecamatan Fanayama ba UNESCO hewa'ae nasa fetaronia lö sitatu (tentatif), ba no sambua fa'atedou ba gotalua hulo tanö bö'ö misa ba zi sagörö Indonesia. Ba da'a moguna wahasara dödö nono mbanua ba wo zago ngawalö lala wa'auri si no lafakhoi ba huku hada ira satua meföna. Manötöna dödö Nono Niha, ena'ö fefu wa'asökhi si so ba Danö Niha tobali fondrou'ö fondröni tödö ndra talifusö si oroi baero hulo Danö Niha.