TikTok

TikTok no sambua aplikasi fariawösa ba Internet moroi ba Tiongkok. Ba da'a lafairö niha ngawalö gambara saliŵa-liŵa (video) sadogo-dogo, mato sara irugi tölu menit wa'anau. Oya la'oguna'ö ia iraono sibohou ebua, me arakhagö fefu nösinia ha fama'igi niha (simane humor ma lawak ba li Indonesia) ma zui same'e humulu dödö niha (faoma fanari ma fanunö sadogo-dogo), ba ha ma'ifu nösinia si tobali börö wangera-ngera. Lahorigö ginötöra niha ba wamaigi-maigi video ba TikTok, irege olifu ira wangai halöŵöra, ba ba ndraono, olifu ira wangawalisi halöŵö moroi ba zekola. So ösa zangosili (li Indonesia peneliti) sanguma'ö wa börö TikTok awö aplikasi fariawösa bö'ö, mo'amböta wa'atedou wangi'ila ba ndraono ba fa'atua-tua niha si lö mamalö mangoguna'ö ya'ia.

So ngawalö data ni'owuloi TikTok nifa'ohe'ö ba danö Tiongkok, si tola tobali sikho khö zangoguna TikTok andrö ba zi so föna. Data ni'owuloi andrö: töi zangoguna, töi fefu zi fariawö khö zangoguna andrö, inötö la'oguna'ö TikTok, heza la'oguna'ö ia, hadia nösi video nifaigi ba nifairöra, ha wa'oya, ha wa'ara, hadia video sabölö omasi-masi ira lafaigi, hadia hou politik zangoguna ya'ia, hadia duho huhuo sasese lafaigi ba latema'ö li, btn.

Börö zikho andre yaŵa, itaria muba'agö TikTok ba negara-negara sangodödögö mamaeri nono mbanuara. Bahiza börö me video TikTok andre hulö sandru, lö la'ila laböhöli wangoguna'ö TikTok andrö niha. Inönö nasa me lö oroma ba hörö fefu ngawalö zikho andrö yaŵa, lamane tödöra niha wa oi faya ia. He alua khöra zi lö sökhi dania, ba lö sa'atö aboto ba dödöra, wa lahalö data ni'oguna'ö ndra niha si faito ba Internet moroi ba aplikasi fariawösa simane TikTok andre.