Waö-waö Melayu

Ba danö Melayu, wa'oya göi zalua meföna si no toröi duriania ba gotalua nono mbanua. Hulö zimane ba danö niha ba ngawalö duria salua meföna simanö ba mbanua bö'ö misa. Ba danö Batam ba nasi ba gotaluara Singapura, so ba da'ö gara sifakhai, ba zahatö ba hulo Belakang Padang faoma hulo Sambu. Si no larongo niha ba nifa'emara ba zanofu turia andrö, wa naha da'ö so meföna zalua nidunö-dunö, ya'ia da'ö no ilömö ma i'fazaumba sitou ba nasi samösa ndraono side-ide razo samu'i, irege idanö ba wetaro nahia da'ö ta'ila na tatörö hulo sambu numalö ba Belakang Padang, ba idanö nia manawu-nawuyu. Sitehöngö ba niha Melayu ba da'ö wa meluo no meföna me lö nasa ato sibai niha, ba Singapura tekaoni Tumasik ma Temasuk sambua höli wa'a razo ba danö Melayu. No ara me alua da'a, ba ndröfi si öfa ngaotu (abad 4). Silö mudöna-döna meluo da'ö, anönö danö wa'oya gi'a toda möi yaŵa ba danö Tumasik, ba abu dödö razo Paduka Seri Maharaja me ato niha mbanua zigöna tuo ma tandru gi'a toda da'ö.

Razo Samu'i

Me no oya niha simate, lö tebato wa'alösökhi dödö razo Paduka Seri Maharaja. I wa'ö ba niha mbanua ena'ö la agö mbewe nasi ba la farege irege, ba wanaha i'a toda sohombo andrö, ba hiza tenga idugu baga, idugu ato zimate nono mbanua. Bagotalua wa'amate niha soya, so göi zöndra.

Söndra Ndraono

So ndraono sibohou ebua, so halöŵö ba nasi ero ma'ökhö, möi ia khö razo ba wanguma'ö ena'ö labatogö wo taha i'a andrö ba ngai nasi, me tenga idugu baga, idugu ato zimate. Ono side-ide andrö, i'andrö faramisi khö razo, ena'ö lagati wotaha ya'ia tenga niha sa'ae, lafake döla gae. Ba hiza meluo da'ö me lö hadöi söndra tanö bö'ö khö namada razo, hewa'ae abua khönia ba i'a'u'ö wolo'ö. Ba hiza no möi lala wanga'alösi niha simate. Ba zilö arara, fefu gi'a no tetaru ba döla ga'e ba irege taya manö.

Ata'u Razo

Me no alö gi'a toda zo tandru niha ba Singapura ma ba Tumasik, mangera-ngera razo, imane, na ebua dania nono same'e söndra no andrö meha'uga bongi, ba te ifatörö ndra'o, me atua-tua sibai ia, irege wa'i tumbu badödönia zilö sökhi, ba ifara'u'ö nono da'ö ba larate gahe ba tanga, ba la'ohe ia ba nasi ba gotaluara Batam Singapura sahatö ba hulo Belakang Padang faoma hulo Sambu, ba la lömö ba wetaro auri nasa lö simate. Ba no sa'ae ni'ata'ufi niha nasi si fafuta gamaudu da'ö ofeta ma'ökhö me no sambua naha si so ameta'uö börö me no irai so wangala.

Lö omasi ira gi'a toda

Börö zalua ba danö Melayu andrö meföna ba ofeta iada'a, böi tokea ndra'ugö, na ya'ira niha Melayu si'onarai ba Singapura, ambö omasi ira ba gi'a da'ö. Oya zino manura sura da'a, tehöngö irugi soi ba zisagörö uli danö. No ato zi no möi mamareso fetaro naha zitefuta idanö, laŵa'ö ba Batam ba danö Melayu lamane : "Langgar Toda". Lö silö mangila turia da'a, ba hiza möi sambua umbu sisökhi ba zombaso me tedou wangi'ila nia.