Fama'ele'ö

Fama'ele'ö ya'ia da'ö halöŵö nilau samösa zangi'ila nifotöi sama'ele'ö ba wanuturu hadia ia zi no alua faoma zi so föna ma si lö alua na. Oya niha ba mbanua sombali'ö ya'ia tolo-tolo ba wa'aurira, la'andrö tolo khöra sama'ele'ö ba wamareso hadia zalua. So zanguma'ö wa sama'ele'ö andre no niha samatohu danga Lowalangi ba wanutura lala ba niha.

Halöŵö zama'ele'ö ba Danö Niha

Lahaogö wama'anö ya'ira ira sama'ele'ö ma si so fangi'ila na lalau monukha. So zamake kofia, samöbö högö, samake falika, samake baru saitö, ba tanö bö'önia. Baero da'ö göi, niha si möi mangandrö tolo khöra lasofu ua hadia manö zedöna lahenagö ba lö olifu lasofu göi hauga game'ela. Na mofökhö atö ndraono simane mofa'aukhu, möi ba zama'ele'ö zatua ba wanofu hadia dalu-dalu ba hezo tesafo nono andrö khöra. Na tefaudugö no itörö dalu deu sino iraono monönö wa'ata'u zatua wa no tesafo. Na tebai atö möi ndraono sofökhö, ama ma inania si möi ba wanofu khö zama'ele'ö, la'ohe manö mbarunia. Nano larugi khö zama'ele'ö, ba latutunö hadia gangandröŵara. Fefu zama'ele'ö oi labörötaigö faoma fangandrö. Aefa mangandrö ira, ba itutunö hadia zedöna tobali dalu-dalu ba zofökhö andrö, si to'ölönia bulu ndru'u. Baero wanuturu dalu-dalu sedöna nibadu ba ma zui nifondri, lafatunö göi hadia gamonitania, irege dalu-dalu andrö futu ia, ma mosöfu. Fama'ele'ö so zino mangodödögö sitobali fanolo ba niha, sito'ölö sifao khönia wolomö, fangomösi ba ofeta ba wangeheta sita'unö ba wangehao boto.

Halöŵö zama'ele'ö ba mbanua sebua

Tenga ha ba Danö Niha alua fama'ele'ö. Ba mbanua segebua misa, no sambua lala nifaehagö ba niha sanoto tivi. Hulö me alua ziheu ba Danö Niha sabölö sibai me döfi 2005, ato zi no mama'ele'ö hadia zedöna alua. Hiza, so zamaduhu'ö ba so göi zi lö manga'i fökhö högönia, mangawuli khö zamösana niha. Ba oya zi no alua nifa'ele'öra ba simanö göi zi lö salua nasa. No ato niha ba mbanua misa sino tehöngö sangila hadia zedöna alua ba gangolifa ginötö, so nifaigira salua barö ndröfi, waŵa ba mazui inötö sara.

Hadia nifalua niha

Hiza, bada'a göi tefatunö, meno sa'ae inötö si so niha iada'a, inötö sino tedou ba wamati ba hegöi ba wangi'ila gofu hada'ia, moguna so wa'aboto ba dödö ena'ö böi aekhu ba wamodombua Lowalangi, ena'ö fanötöna niha ha khö zokhö banua siyaŵa awö danö. Eluahania, labe'e fönara wamati khö Lowalangi ba ngawalö waö-waö wa'aurira, ena'ö aefa ira ba wa'onekhe halöŵö zogömi-gömi ifatewu ia hulö na moroi khö Lowalangi wangi'ila andrö. Niha iada'a no so wa'aboto ba dödö khöra ba wo fili lala ba wa'afarisayo. Na so zofökhö ba tola lafafareso'ö ua ba rumasaki ena'ö aboto ba dödöra hadia zalua ba ndroto-ndroto mboto, me sohalöŵö ba rumasaki no so wakake sanolo ba wangi'ila hadia zalua ba mboto niha. Hiza fama'ele'ö ba Danö Niha, tenga ha iada'a alua ia, no i'onarai meföna, so manö fasamösa ba zisambua banua misa.