Milo ba Danö Niha

Milo ba Danö Niha, tenga simane milo ni'ila niha ba zisagörö Indonesia simane töi ŵe gurifö (Susu merk Milo). Na si no la'ila niha, milo ba da'a sambua produk si fagölö ba susu. Na ba Danö Niha no sambua halöŵö fe'amöi ba wamaigi kabu, möi ba gowi, ba tanö bö'önia, no simanö milo ni'ila ba Danö Niha. Milo nifaluo ndra satua, ina ma ama sofanö ba kabu, lamane, möi milo. Milo ohitö dödö ya'ia ba wangalui soguna ndrege zi so ba kabu, eluahania, si möi milo, i fakoli wangera-ngerania, hadia manö zedöna ihalö ba we milo andrö sifaudu fe'aso ba kabu si möi ya'ia. Ni'ohe niha simöi ba we milo, ya'ia da'ö ; na ira alawe atö zi möi milo, ba ni'ohenia simane; bola-bola, si'öli, si'ogowi, ba lö olifu ia wolohe sandrari (hakhi nohi soköli) ba na lö hadöi sandrari ba la'ohe ndrundrunga galitö ena'ö lafaewua'ö ba naha gowi dania. Na ira matua atö, ba si to'ölönia, belewa sebua, endra'i (eza'i, endrawi), ba bola-bola naha gahulua ba we milo. Da'ö we milo si no alua tenga ha iada'a ba Danö Niha, no i'otarai meföna fe milo andre, sambua famalua halöŵö baero nomo salua ero ma'ökhö ba wongambatö niha ba Danö Niha.

Ni halö ba we milo

Milo sindruhunia, sambua fa'omasi niha si so ba Danö Niha, ba we'amöi ba mbolo kabu. Fondrugira ba mbolo kabu, na lafaigi moroi ba nifaluara, lö hadöi ni angeragö sibai hadia ni ohalöŵögöigöra, hiza gofu hadia ia zi falukha ia ba zi sagötö inötö wo fanöra, da'ö ni faluara, simane, so wofo sitola lahalö ba lala fatua lö larugi naha gowi, lahalö ua da'ö, ba lala oya geu galitö sifalukha ira si no oköli ba tola alio la'oguna'ö, hiza lö ibaloi wangawulinia, i'anga'i'ö, simanö we mila ba Danö Niha. Ira ina sondrugi ba naha gowi, fefu la babaya, lahaogö khöra gowi si no tetanö, gowirio, rigi, lada, harita, ba sinanö si no tetanö bada'ö, ba na so khönia göi danömö ba mbola-bolania, ba tola ulau mananö sinanö. Baero da'ö, i'ofösi, ihori ndru'u, ba si lö olifu ira, lafaewua'ö galitö, ba wame'e tandra ba niha sedöna manörö ngai da'ö wa so niha ba naha gowi, ba sabölö fagönania, na so zimbo galitö, ba no möi fameta'u gutu ndru'u sedöna möi mamakiko sinanö si no tetanö ba naha gowi da'ö.

Milo, andre sambua famahaö si sökhi sibai alua ba Danö Niha, me no latanögö ba dödö ndraono ba wangomasi'ö tanö si no ehanagö So'aya somböi banua siyaŵa awö danö, ba wangahaogö, sitobali naha ba wangalui soguna. Baero da'ö, famaha'ö ba ndraono sibohou ebua ena'ö owölö-ölö we'amöi ba danö inönö me Tanö Niha, no tehöngö, tanö satabö sinanö.