Lature (tuha samatörö ulidanö)
Lature no samösa moroi ba gotalua hadauga duha samatörö ulidanö molo'ö famaigi Ono Niha me föna. Molo'ö nidunö-dunö baero Lowalangi, tuha samatörö ulidanö, so göi Lature. Si lö'ö-lö'önia da'ö nitutunö ndra satua khö Kleinweg de Zwaan me möi ia ba Danö Niha.[1] He Lowalangi ba he göi Lature no tumbu moroi ba mbua geu nifotöi tora'a. Eu tora'a samösa no tumbu moroi ba dödö Tuha Alölöanangi, si toröi ba mbanua si yaŵa.
Asese lafakhai khö Lature niha na mofökhö ira. Börö da'ö lafosumange Lature niha ba labe'e khönia mbuala ena'ö böi mofökhö ira.[2]
Töra moroi ba da'ö so niha me föna si fahudu tödö wa niha ba gulidanö andre no okhöta Lature. Da'ö wa labe'e töi Lature göi Sobawi Sihönö ma zui Lature Sobawi Sato.[2]
Ndrege wa'ahakhö dödö Lature ba tola ihalö noso sageu ma ha'uga nga'eu "mbawi" andrö ba ibe'e ö domenia. Börö da'ö si lö tola lö'ö i'eregesi tödö niha ena'ö böi ya'ia nihalö Lature ba hiza i niha bö'ö. Na lö tola ihalö dödö Lature ba lua-luania ya'ia zimate.[3]
Si tobali tandra khöra wa arakhagö ihalö khönia "mbawi" Lature oroma khö niha löfö-löfö ba zi bongi. Börö da'ö ata'u niha me föna na la'ila möi löfö-löfö bakha ba nomora. Tandra khöra da'ö wa ba zi lö ara tö edöna mofökhö ba mate samösa niha yomo ba da'ö.[3]