Konsili

Konsili no rafe sebua bakha ba Gereja, heza owulo fefu ndra uskup ba wamahuhuosi ngawalö wamahaö Gereja si no tobali nisofu-sofu niha ba zi sambua ginötö. Fabö'ö konsili moroi ba rafe sebua bö'ö, börö me ha konsili zi tola mangetu'ö goi-goi awö huku sanandrösa ba wamati ba famahaö Gereja, si itaria latötöi niha goi-goi ma huku kanonik. Itaria latötöi göi konsili simane konsili ekumene, me si fao khönia no salahi ndra niha samati moroi ba zi sagörö ulidanö, tenga ha moroi ba zi sambua nahia, ma sambua negara, ma sambua gölana.

Fabö'ö göi konsili moroi ba sinode, sambua rafe sebua bö'ö bakha ba Gereja. Itaria göi ikaoni sambua sinode amada Paus ba wamatunö ngawalö wamahaö Gereja soguna mubotokhi ba zi sambua ginötö. Ba rafe simane owulo göi ndra uskup moroi ba zi sagörö ulidanö. Bahiza tenga simane angetula konsili, lö tobali huku gangetula sinode. Ha tobali ia bua wangera-ngera khö Paus ba wangetu'ö ya'ia.

Baero sinode ndra uskup moroi ba zi sagörö ulidanö simane, so göi sinode ndra uskup bö'ö moroi ba zi sambua negara ma mato ha'uga negara. Ba so nasa sinode ndra niha samati bakha ba zi sambua keuskupan, heza lafatunö ngawalö zi fakhai ba halöŵö wanuriaigö Turia Somuso Dödö awö ba wangebua'ö amatöröŵa Lowalangi ba zi sambua keuskupan andrö. Simane ba oi sinode bö'ö andrö yaŵa, fefu gangetula ha tobali börö wangera-ngera khö uskup ba wamatörö ya'ia, tenga tobali sambua goi-goi ma huku nifotöi goi-goi ma huku kanonik.