Hurufo Ŵ Faoma W ba Li Niha

Moroi ba Wikipedia

Li Famasao[bulö'ö | bulö’ö kode]

Ba mbuku Ni'amoni'ö (ba Li Niha) nifa'anö Sundermann so hurufo Ŵŵ ba so göi Ww. Faduhu dödöda fefu ŵa no to'ölö sibai ita ŵangoguna'ö hurufo ŵ ba he göi hurufo w. Na ba mbuku Gamabu'ula ma zui asese lawa'ö Buku Ni'amoni'ö ba oroma khöda ŵa hurufo ŵ te'oguna'ö ia na tawa'ö 'baŵa' (ba li Ndraŵa = bulan). Simane na tatötöi ŵehede 'bawang' ba li Ndraŵa. Na tafaedogö ba mbuku gangoŵuloa ŵehede nifa'anö ma zui ba li Ndaŵa lawa'ö Kamus Nias, Apolonius Lase, ba no ihalö lala si fabö'ö moroi ba nisura Sundermann. Fefu hurufo w simane ni'ilada ba li Ndraŵa ba ŵehede: 'bawang', 'Wati', 'wawasan', molo'ö Apolonius Lase, lö sa'ae moguna labe'e dandra tilda ba hurufo w, simane ba ŵehede 'siyawa', tenga 'siyaŵa', elewazi tenga eleŵazi.

Dane-dane[bulö'ö | bulö’ö kode]

Ba mbuku gangoŵuloa ŵehede nifa'anögu (Apolonius Lase), no ube'e zinura sanandrösa ba ŵanura fehede si so ŵ mazui w. Sitobali dane-danegu, sambua ua, hurufo w simane ba ŵehede 'yawa' no fagölö ŵanötöi ya'ia simane 'bawang' ba li Indonesia. Irege, umane tödögu, lö sala na tafagölösi manö ŵangoguna'ö ya'ia me no fagölö wanguma'ö ya'ia ba li Ndraŵa. Simane ni'ilada fefu, goi-goi ba li Indonesia, ba no tobali duma-duma khöda ba ŵo erunösi li niha andre.

Aboto ba dödögu ŵa so manö zambö fao fangera-ngera khögu me no ha'uga ŵulu fakhe ma aefa otu fakhe no te'oguna'ö li niha si so ba Mbuku Ni'amoni'ö. Na tafabö'öni ba so manö niha si no to'ölö mombaso taroma Li ba manofu-nofu dödöra. Andrö ŵa dania ndra högö gosali mangosara ira ŵa la oguna'ö manö simane nisura Sundermann ba Mbuku Ni'amoni'ö.

Erena simanö, moguna göi zöndra da'a lafondrondrongo ya'ira si fao ba ŵo foeluaha daroma Li, ma ba ŵobohuni ŵamo'eluaha ya'ia.

Sahago ita[bulö'ö | bulö’ö kode]

Asese sibai ufa'ema zöndragu ba zinuragu ba ginötö si no numalö ena'ö so ŵa hasara dödöda. Me li andre, gofu hezo ia, ba terorogö ia molo'ö fahasara dödö ndra samake ya'ia. Andrö dania ato ndra talifusöda zame'e bua ŵangera-ngera ena'ö hasahago ita datafagölösi ŵanötöi w simane ni'ilada ba Li Ndraŵa. Ba zinura nibaso ndra ama-ina ba talifusögu fefu andre u'andrö ŵa ahele dödömi ena'ö sahago ita ta'osara'ö dödöda. Aoha göi namötö khöndra talifusöda si tenga ono niha ba ŵombaso li niha.

Ondröita nafuri[bulö'ö | bulö’ö kode]

Hiza ŵa lö ta'ila ha ŵa'aratö tola anau nosoda, me lö si ogötö'ö ba guli danö andre. Fefu ita, si no numalö ndröfi ba so ginötönia, lö ta'ila haŵa'ara, ba mofanö ita, lö sa'ae ta'ila hadia zalua ba li Niha furida. Hatö iraonoda, ira ma'uŵuda zanohugö, irege sanau ölö li niha andre. Afu aoha khöra (iraonoda ba ira ma'uŵuda) ba tabe'e lohe-lohera ba ŵanohugö fondrorogö li niha.

Pranala luar[bulö'ö | bulö’ö kode]

  • [1] [Kamus Li Niha, nifa'anö Apolonius Lase]