Agama Gaberahamo

Moroi ba Wikipedia
(Saekhu moroi ba Famati Samawi)
Ae ba navigasi Ae ba wangalui
Simbol zi tölu agama fondrege sebua samaduhu'ö Aberahamo tobali ama zamati khöra: Kristen, Islam ba Yahudi

Agama Gaberahamo ma abölö faudu Ngawa Agama Gaberahamo no töi ni'oguna'ö ba wangosili ilmiah (li Indonesia penelitian ilmiah) ba wanötöi fefu agama samaduhu'ö Aberahamo tobali ama zamati khöra. Ba li Indonesia lafotöi ia Agama Abrahamik, ba li Inggris Abrahamic religions. Ba hiza so ba gotalua niha ba Indonesia zabölö omasi mangoguna'ö li Arab andrö wa latötöi agama samawi. Te ena'ö alio ta'ila geluahania abölö sökhi tatötöi manö ia Agama Gaberahamo ma zui Ngawa Agama Gaberahamo, eluahania fefu agama si tefaböbö khö Gaberahamo.

Agama-agama si tefaböbö khö Gaberahamo andre ya'ia da'ö agama Yahudi, agama Kristen, ba agama Islam.

Ngawa Agama Gaberahamo[bulö'ö | bulö’ö kode]

Yahudi[bulö'ö | bulö’ö kode]

Simbol agama Yahudi

Bakha ba agama Yahudi latötöi Gaberahamo Amama Aberahmo (Avraham Avinu (אברהם אבינו))[1] ba latötöi Lowalangi Lowalangi Gaberahamo, Lowalangi Giza'aki ba Lowalangi Yakobo (Elohei Abraham, Elohei Yitzchaq ve Elohei Ya'aqob). Ba ngawalö döi ni'oguna'ö andre oroma wa la'odane-danegö wamatira bakha ba wamati si no ibörötaigö Aberahamo.

Kristen[bulö'ö | bulö’ö kode]

Simbol agama Kristen

Bakha ba agama Kristen, Aberahamo no lafotöi ama zamati. Simane ndra niha Yahudi omasi göi ndra niha Keriso wamaduhu'ö wa famatira khö Lowalangi no amatohula wamati moroi khö Gaberahamo. Ba mböröta ira niha Keriso no föfö bakha ba agama Yahudi.[2][3][4] Ba hiza lö ara me no mate Yesu, solohi khönia nifotöi ira niha Keriso oi muzawili misa ba si sagörö gölana wamatörö Roma ba famahaö wamatira itugu ara itugu fabö'ö moroi ba wamahaö bakha ba agama Yahudi.[5]

Islam[bulö'ö | bulö’ö kode]

Simbol agama Islam

Simane ndra niha Keriso si so aefa ndra niha Yahudi, simanö göi ndra niha Islam nifasindro Muhammad ba danö Arabia me otu ndröfia si fitu omasi ira wamaigi famatira tobali balö wamati soroi khö Gaberahamo.[6]

Söndra si tobara[bulö'ö | bulö’ö kode]

Lö ha sara zöndra fefu ndra sangosili ilmiah (li Indonesia peneliti ilmiah) sanandrösa ba wawongawa agama-agama andre barö döi Agama Gaberahamo. Ba gotaluara sangosili sotöi Alan L. Berger. Molo'ö ya'ia, heŵa'ae so zi fakhili ba gotalua fefu agama Gaberahamo, so "zi fabö'ö esensial ba gotalua fefu tradisi" andrö. Heŵa'ae "agama Kristen ba Islam tumbu moroi ba Yudaisme", tölu lala wamati nifotöi monoteis andre (lafotöi ira monoteis, me faduhu dödöra Lowalangi si ha samösa) no oi latörö lalara ero zamösana.[7]

Sangosili bö'ö solaŵa istilah Agama Gaberahamo töinia Aaron W. Hughes. Molo'ö Aaron, famongawa agama Yahudi, Kristen ba Islam bakha ba zi sambua kategori, tola mondrou'ö nifotöi dialog ba gotalua agama-agama. Ba hiza famongawa andre no artifisial, lö faudu ba tobali ia taha-taha ba wangi'ila kompleksitas interaksi ba gotalua fefu agama andrö.[8]


Umbu[bulö'ö | bulö’ö kode]

  1. Levenson, Jon Douglas (2012).Inheriting Abraham: The Legacy of the Patriarch in Judaism, Christianity, and Islam. Princeton University Press. ISBN 978-0-691-15569-2.
  2. Stephen Wylen, The Jews in the Time of Jesus: An Introduction, Mahwah, Paulit Press, (1995), page 190.
  3. Wayne-Daniel Berard, When Christians Were Jews That Is, Now: Recovering the Lost Jewishness of Christianity With the Gospel of Mark, Cambridge, Cowley Publications, (2006), pp. 112–113.
  4. N. T. Wright, The New Testament and the People of God, Minneapoli, Fortress Press, (1992), pp. 164–165.
  5. Daniel Boyarin. "Dying for God: Martyrdom and the Making of Christianity and Judaism". Stanford University Press, 1999, p. 15.
  6. Peters, Francis Edward (2003). Islam, a Guide for Jews and Christians. Princeton University Press. nga'örö. 9. ISBN 978-1-4008-2548-6.
  7. Alan L. Berger, ed., Trialogue and Terror: Judaism, Christianity, and Islam after 9/11 (Wipf and Stock Publishers, 2012), xiii.
  8. Aaron W. Hughes (2012). Abrahamic Religions: On the Uses and Abuses of History. New York: Oxford University Press, nga'örö 3-4, 7-8, 17, 32. isbn=978-0-19-993464-5 (Li Inggris)