Falailö

Falailö, no sambua waö-waö ni falua niha ba Danö Niha, na mo möi ba kabu, sitobali fondrara dödö. Sito'ölönia, laöli nilaura, lailö sawakhö-wakhö wamondrongo niha. Lailö sambua fanötöi ba zanunö fetaro ba zihasamösa-mösa. Na ya'ira situmbu ba danö wangarato, he na la'ila Li Niha ba lailö tola manö fehede sibohou khöra da'ö, me ni'ilara, manunö, sanunö, sinunö. Hiza falailö no ara lafalua ira satua meföna na so ira ba mbalö halöŵöra, me na ba danö ma ba kabu terongo zifalailö, ba fefu niha samondrongo, ba fao ira ba wa'aterara dödö. Na terongo lailö andrö, ba tola latahö niha, moroi ba lailönia, hadia si falailö andrö, fa'omuso dödö zamena alua khönia, ma fa'abu dödö. Ba da'a no tobali sambua sitehöngö ba danö niha. Ono niha oi sonekhe falailö.

Baero walailösa andrö, ba so göi zifakhai ba lailö ya'ia da'ö, Tari Lailö Yöu. Fanari lailö yöu andre, no sambua fanari si no to'ölö lafalua ba gangowuloa fa'omuso dödö ba wetaro mbanua Yöu, fanarinia sifao fa ombuyu daelu, simane fasile. Fadaelu zi falailö, ba lalau manunö simane sinunö: Fekoligu ba gulidanö. ba sinunö tanö bö'önia..

Fa'ombuyu daelu, tola te'ila ba wa'afatö-fatö wanarinia, hulö zifao ba note zinunö wa'atogeha mbotonia. Lö dozi niha oi ombuyu daelu, ha ya'ira si no so wa'onekhe ba sile. Tari Lailö Yöu moguna lafatohu ba ndraono sibohou ebua, irege lö taya ia ba ginötö si no fondrege wa'atedou wangi'ila andre iada'a.