Emali sangai högö

Meföna tehöngö ba zi sagörö Tanö Niha ero'ero baŵa sitölu inötö nemali sangai högö, inötö da'ö niha a oi mangelama lö mofanö ha samösa niha yamenduamanö na möi milo, oi zara la fa'anö wakake fangöna simane toho, gari ba tanöbö'önia, simanö wanutunö ndra satua ma ira tuada ba zi lalö. Te so mato tölu ngafulu fakhe ambö töra wa'ara irugi mane ma'ökhö lö terongo-rongo nifotöi emali sangai högö ba Danö Niha, telalö ginötö idugu teboka hörö no oi agatua-tua niha, yamendrua iya'e inötö fefu niha ba zi sagörö ulidanö faoma mu'ila hadia zalua, börö da'ö sanandrösa ba hikaya nemali andre, ba wonönö fangi'ila niha ba lohe-lohe göi khöda ena'ö lö olifu ndraonoda ma mahoda ba ginötö si so föna sitobali famaha'ö wa hikaya nemali andre wasinduhu-ndruhu so me ba zi no numalö, börö da'ö moguna la'alui ma lafaehagö hadia si'ai mbörö wa alua ma so nifotöi emali sangai högö ba Danö Niha ba ginötö da'ö.

Emali sangai högö

Meföna ba Danö Niha fatua lö ofeta duria somuso dödö ma agama Kristen so nifotöi fangai binu ma fangai töla högö niha molo'ö wa'afaduhu dödö ba wamönui (Li Indonesia Menyempurnakan) dadaoma fa'a-Si'ulu ma fa'a-Balugu molo'ö bosi ba wetaro ba hada ba Danö Niha. Molo'ö nidunö-dunö ndra satua föna, na mate Zi'ulu ma Balugu siso ba mbosi si 10 ofeta 12 (bosi si fulu ofeta felendrua) fatua lö muko'o mube ba hasi ba silö tola lö'ö labe'e tufonia döla högö (Li Indonesia tengkorak) he ha 6 (ömö) ngawua ba so göi zi 12 (felendrua). Na no lumalö wa'abihasa ma fa'afua ndröfi Zi'ulu ma Balugu na no arakhagö mate, moguna lahenagö binu ma töla högö niha. Andrö dania lafatenge niha ma onomatua sabölö töla onomatua salio boto si no mangokhögö öba ma elemu (Li Indonesia ilmu kebal tahan dibacok dan tahan ditombak) fanaha mbawa gari fanaha nikhu doho, ba we'amöi mangai högö ba mbanua bö'ö ba mbanua saröu si lö amakhaita ba mbanuara. Niha nifatenge tenga ha samösa, ya'ira andre nifotöi Emali sangai högö. Bagotalua nemali sangai högö so darua zino tehögö ba Danö Niha ya'ia da'ö:

Ama Dugala

Haniha ira? Molo'ö fanutunö ndra satua ba Danö Niha ba zi lalö, sotoi Ama Dugala ya'ia da'ö samosa niha so elemu sitola tenge-tenge niha ba wangai högö, irege töi da'e tehongo ba zifasui danö niha yamendrua sa'ae nano ofeta mbaŵa sitolu ya'ia da'o baŵa nemali, a'oi fa ama-ama dugala niha, ba ginötö da'ö tabali fameta'u-ta'u ndraono

Ama Horofia

Faoma ira nama dugala nomege, simane hikaya nidunö-dunö ndra satua badanö niha, ama horofia moroi khöra moroi raya, so zanguma'ö niha gurunga, tobali tenge-tenge wangai högö.

Baginötö muhöngö-höngö so nemali badanö niha, tebai mofanö niha haya'ia möi mohalöŵö bakabu, banowinia, fao wofanö, yamendrua ndaono, lösa'ae tödöra we'amöi sekola ata'u ira nemali. Na u'angeraigö tödögu hikaya nemali badanö niha, abölö ebua wa hasinörö hikaya, so'ösa wa ambö fa'atua tua irege salua ba wa'auri niha badanö niha aröu toröi moroi ba mbanua ma soi bazifasui, hadia mbörö ahori ginötöra bawa'ata'u banemali ifaböhöi'ö nono khönia bazekola, iraonogöi lösa'a ibe'e dödönia wolohi fa'atua tua, eluahania fa'abodo falö'ö mangila tetohugö. Si'ulu si'ulu, niha nisagani bazisambua-sambua öri, si no irai molau owasa, nga'ötö zamasindro öri, mo okhöta, hadia manö zomasi ia tola ifalua, balö sa'aeniha sifagölö khönia. Samuza inötö si'ulu i'ila wa no atua ia balö aratö ginötö wa'amatenia i oroi'ö baniha ma bandaono nia namate dania ia, ena'ö la faogö khönia högö niha lima.