Deepfake
Lafotöi deepfake (ma deepfakes na oya ia) fefu ngawalö audio, video awö foto hinare si no mubulö'ö faoma fakake digital, irege oroma fakhili sibai ia ba niha ma nahia sedöna mu'oroma'ö bakha khönia, heŵa'ae tenga sindruhu ia. Sito'ölönia lafazökhi video, audio ba foto simane faoma fakake digital nifotöi AI (artificial intelligence) ba li Inggris ma kecerdasan buatan ba li Indonesia. La'oguna'ö video, foto, audio da'a niha sobou tödö ba wolimo niha samaigi ya'ia, ena'ö faduhu dödöra ba duria hinare sanandrösa ba niha somasi ira la'obousi tödö. Tola manö ha lafalali mbawa niha bakha video andrö, bahiza tola töi lafaogö li awö foto ni'a'azökhira samösa.
Töi deepfake
[bulö'ö | bulö’ö kode]Deepfake no ngawua wehede ba li Inggris, nihalö moroi ba deep, eluahania abakha, ba fake, eluahania tenga sindruhu, ha nikhalaini zindruhunia. Lafotöi fake duma-dumania mbaru sebua soroma hulö moroi ba guli nambi, bahiza sindruhunia moroi ba plastik nifazökhi mokhalaini guli nambi. Simanö göi lafotöi fake news sambua duria si lö atulö, nifazawili hulö turia sindruhu.[1]
Lafotöi ngawalö foto, audio, ba video hinare andre deepfake, na lafazökhi ia faoma komputer sofa'abölö iada'a, si tola mamazökhi foto, audio awö video si sökhi sibai, irege lö tola la'ila niha sa'ae hadia sindruhu ma tenga ni'oroma'ö bakha khönia.
Hewisa wamazökhi deepfake
[bulö'ö | bulö’ö kode]La'oguna'ö nifotöi famomaha mesin, eluahania lafatörö bakha ba mesin komputer oya gambara, foto, video, audio irege itugu ara itugu tola ifazökhi gambara, audio ma video si fakhili komputer andrö. So program bakha ba komputer sanöngöni hewisa mbawa niha, hewisa linia, ba hewisa fahuhuo ia.
Hana lafazökhi deepfake
[bulö'ö | bulö’ö kode]Ba mböröta lafazökhi oi da'a niha ha soguna ba wama'igi. Bahiza me itugu onekhe komputer ba wamazökhi foto, audio awö video si sökhi sibai, irege lö la'ila sa'ae niha hadia sindruhu ma tenga ia, labörötaigö la'oguna'ö ia ba wamazaewe turia hinare, hikaya si lö duhu nitutunö niha hulö na sindruhu ia. Iada'a itugu oya video hinare ni'oguna'ö ba wangobousi töi ndra sohalöŵö ba politik, sohalöŵö ba agama, sohalöŵö ba wamatörö, btn.
Lua-lua
[bulö'ö | bulö’ö kode]Me itugu oya audio, foto awö video hinare nifazaewe ba gu'ö Internet, itugu mangiwa dödö niha ba ni'ila ma nibasora ba Internet. Tola manö wa faduhu dödöra ba ni'ila, nirongo ma nifaigira, heŵa'ae sindruhunia oi faya ia nifazaewe niha sobou tödö. Asese la'oguna'ö da'a niha ba wame'e ena'ö fatuwu dödö niha ba mbawa niha bö'ö, ba hada khöra ma zui ba hohou politik ni'o'öra, btn.
Umbu
[bulö'ö | bulö’ö kode]- ↑ Ato niha sangoguna'ö fehede fake news ba wame'e ena'ö böi faduhu dödö niha ba duria sanandrösa ba gamuatara si lö faudu ba zi lalö, heŵa'ae sindruhu ia.