Barelang

Barelang, ya'ia da'ö fehede fangadogo'ö moroi ba döi mbanua na la anaukö ia : Batam, Rempang ba Galang. Töi mbanua da'a tesöndra ba mbanua Kota Batam, si so ba Propinsi : Kepulauan Riau. Banua da'a sambua hulo sahatö sibai moroi ba Negara Singapura. Niha si so yaŵa ba hulo da'a ya'ia da'ö soi Melayu. Ba Batam, na ero luo wangöhöna na ba danö niha, ma hari sabtu faoma minggu, böi tokea ndra'ugö na falukha'ö niha si tenga niha Indonesia, ya'ira niha Singapura, sanörö ba Batam, me tola mangawuli ma'ökhö. Inötö ni'oguna'ö moroi ba Batam numalö ba Singapura ha öfa wulu a lima menit.

Fehede Barelang andre, no la oguna'ö ba döi zoroso samakhai tölu banua, ya'ia da'ö : Batam, Rempang faoma Galang. Soroso Barelang andre, no sitobali nitöngöni dozi niha simöi ba Batam, me no sökhi sibai wangahaogö ya'ia ba wo fa'ötö nono mbanua we'amöi ba zitambai, me so nasi ba gotalua hulo-hulo si gide-ide, sitebai ni'ötö na tenga fake tundraha ma köfa. Da'ö hare we'aso zoroso Barelang, no aoha ba niha fefu we amö ba zitambai ba Rempang faoma Galang. Dozi zimöi ba Batam, ha sambalö möi ira ba zoroso Barelang, mo möi fakoda. Ba da'ö göi so zino lahaogö naha ira famareta ahatö bangai zoroso, ni be'e ra töi "Dendang Melayu" irege baga sibai wakodasa, no ahatö sibai zoroso. Ba Barelang andre, no te'oli naha wanörö ngai nasi (pariwisata) simane : ngai nasi ; Setokok. Da'a fetaro ba zoroso si tölu (Jembatan 3) föna ma'ifu so naha wanörö ba ngai nasi ni be'e töi : Pantai Mironta. Möi miföna ma'ifu ba zoroso si lima (Jembatan 5) so naha wanörö sotöi : Pantai Melur. Baero da'ö, ba Barelang gamaudu mbanua Galang, ba da'ö no lahaogö ira famareta pusat naha rumasaki zi göna COVID 19 fetaro ba naha Camp Vietnam, naha niha Vietnam memböröta soloi ba mbanuara sinumalö ba Indonesia, ba Galang, Batam. Töi rumasaki da'ö ya'ia da'ö : RUMAH SAKIT KHUSUS INFEKSI COVID-19 PULAU GALANG.

Hulo sahatö

Ba Barelang, si so ba danö Melayu ba Kepulauan Riau, fetaro zoroso Barelang si so önö ngawua zoroso (Jembatan 1-6) oya hulo sigide-ide, sahatö ba zoroso si sara (Jembatan 1) simane hulo sotöi Pulau Nipah, hulo sotöi Pulau Akar, hulo sotöi Pulau Setokok, ba wa oya nasa hulo tanö bö'ö. Fa'auri niha si so ba hulo da'e ya'ia da'ö mangalui fa'auri ba nasi.

Hulo sebua sifaola

Hulo sebua sahatö ba Batam, ya'ia da'ö: Tanjung Pinang, Karimun, Bintan, Natuna, Tarempa, ba tanö bö'önia. Fefu mbanua ma hulo segebua da'ö faoma Batam barö wamatörö wamareta : Propinsi Kepulauan Riau.

Soi si so ba Barelang

Sangiagö tanö Batam ya'ia da'ö soi Melayu. Ba meno so wa atedou wangahaogö banua, ba no so wa'atohare niha moroi ba soi bö'ö, irege iada'a, no arakhagö dozi soi no so ba mbanua da'a. Inönö me ba Kota Batam andre, sambua mbanua naha fabiri sebua sangahaogö ngawalö wakake elektronik Archived 2021-10-20 at the Wayback Machine, simane sangahaogö Handphone, laptop, printer, AC ba tanö bö'önia. Börö me banua naha fabiri, tatu manö niha moroi ba mbanua bö'ö tohare ba wangalui halöŵö ba Batam. Niha ba ziso ba hulo sahatö ba Barelang, sabölö oya soi Melayu. Ba halöŵöra, sangalui i'a ba nasi mamake tundraha, ma ba li Indonesia perahu ba da'a laŵa'ö pompong.